செய்தக்க செய்யாமை!

இனிய தோழர்! நலம் தானே?

- 

தெரு நாய்கள், மக்களின் இயல்பு வாழ்க்கைக்கு எந்த அளவிற்கு அச்சுறுத்தலாக இருக்கின்றன என்று புதிதாக யாரும் வந்து சொல்ல வேண்டியதே இல்லை. இந்த விவகாரத்தில் ஏன் எந்த முன்னேற்றமும் இல்லை என்பதே மிகப்பெரிய கேள்விக்குறியாக இருக்கிறது. அரசின் முயற்சிகள் என்னென்ன ? ஏன் ஆட்சியாளர்கள் இந்த கொடுமையான பிரச்சனைகள் பற்றி வெளிப்படையாக பேச தயங்குகிறார்கள்? இதன் பின்னணியில் மாபியாக்கள் இருக்கின்றன என்றும் அதிகாரத்தில் இருப்பவர்களுடன் இந்த மாபியாக்களுக்கு தொடர்புகள் இருக்கின்றன என்றும் பரவலாக பேசப்படுவது உண்மையா?

நாய்களை கட்டுப்படுத்துவது தொடர்பாக உயர் நீதிமன்றமும் உச்ச நீதிமன்றமும் பிறப்பித்த உத்தரவுகள் எல்லாம் ஏட்டளவில் மட்டுமே உள்ளன. அவற்றை அமல்படுத்துவதில் என்ன சிக்கல் என்று பாமர மக்களால் புரிந்து கொள்ளவே முடியவில்லை. கொஞ்சம் அலசி பார்த்தால் தெரியவரும் தகவல்கள் நம்மை அச்சுறுத்துகின்றன. பெருகி வரும் நாய்களுக்கு

மிக முக்கிய காரணம் அவைகளுக்கு இனப்பெருக்க தடை ஊசி போடுவதில் நடக்கும் மிகப்பெரிய ஊழல் தான் என்கிறார்கள் சமூக ஆய்வாளர்கள். இதற்காக ஒதுக்கப்படும் பல கோடி ரூபாய்கள் உள்ளாட்சி அமைப்புகளின் அதிகாரிகள், சில ஆட்சியாளர்கள், இந்த பொறுப்பை கையாளும் தனியார் நிறுவனங்கள் ஆகியோர் அடிக்கும் கொள்ளையில் காணாமல் போய்விடுகிறது என்கிறார்கள். நாய் கடிக்கான மிக மிக பிரம்மாண்டமான வணிகம் இதன் பின்னணியில் ஒளிந்து இருப்பதாக தெரிகிறது.