விண்வெளி பயணமும் 'லைக்கா' நாயின் தியாகமும்!

நவீன உலகில் விண்வெளி ஆராய்ச்சியில் மனிதகுலம் அபரிமிதமான வளர்ச்சியைக் கண்டுள்ளது.

- -தவா

பல்வேறு நாடுகளைச் சேர்ந்த விண்வெளி ஆய்வு மையங்களும் நிலவையும், செவ்வாய் கிரகத்தையும் தாண்டி சூரியனின் மேற்பரப்பு வரை ஆராய்ச்சியை வேகப்படுத்தி வருகின்றன.

தற்போது வெகு இயல்பாக விண்வெளி வீரர்கள் சர்வதேச விண்வெளி மையத்திற்கு சென்று திரும்புகின்றனர்.

ஆனால், விண்வெளியில் இத்தனை சாதனைகள் நிகழ்த்துவதற்கு ஒரு நாயின் உயிர் தியாகமும், அதன் விண்வெளி பயணமும்தான் காரணம் என்றால் நம்ப முடிகிறதா? ஆம், விண்வெளிக்கு சென்ற முதல் உயிரினம் 'லைக்கா' என்ற நாய், அது தியாகத்தின் அடையாளமாக இன்றளவும் கொண்டாடப்படுகிறது.

ஐந்தாறு தசாப்தங்களுக்கு முன்பு விண்வெளி பயணம் அத்தனை எளிதாக இருக்கவில்லை. வளிமண்டல அடுக்குகளைத் தாண்டினால் பரந்து விரிந்த விண்வெளியானது உயிர்களில் எத்தகைய தாக்கத்தை ஏற்படுத்தும், எத்தகைய பாதுகாப்பு கவசங்கள் தேவைப்படும் என்பது பற்றிய ஆழ்ந்த புரிதல் தேவைப்பட்டது.

இதனால் மனிதர்களை அனுப்புவதற்கு முன்பு சோதனை முயற்சியாக பல்வேறு உயிரினங்கள் விண்வெளிக்கு அனுப்பி வைக்கப்பட்டன.

இரண்டாம் உலகப்போருக்கு பின்பு 1947-ஆம் ஆண்டு அமெரிக்க விஞ்ஞானிகள், வி2 பாலிஸ்டிக் ஏவுகணைகளில் பழ ஈக்களை நிரப்பி விண்வெளிக்கு அனுப்பினர்.

அண்டத்தின் கதிர்வீச்சு ஏற்படுத்தக்கூடிய தாக்கத்தை அறிய, மனிதர்களின் மரபணுவுடன் தொடர்புடைய பழ ஈக்கள் முதலில் தேர்வு செய்யப்பட்டன.

அதைத் தொடர்ந்து 1949-ஆம் ஆண்டு ராக்கெட் பயணம் ஏற்படுத்தும் உயிரியல் விளைவுகள் பற்றி அறிய ரீசஸ் என்ற குரங்கு, விண்வெளிக்கு அனுப்பி வைக்கப்பட்டது.

இதன்மூலம் விண்வெளி பயணத்தின்போது இதயத்துடிப்பு சுவாசம், உடலியல் செயல்முறைகள் எத்தகைய மாற்றம் அடைகின்றன என்பதை விஞ்ஞானிகள் கண்டறிந்தனர். துரதிஷ்டவசமாக அந்த குரங்கு இறந்துவிட்டது.