நேர்மறை உளவியலின் தூண்கள்!!

நேர்மறை உளவியலில் நாம் இதுவரை பேசிய விஷயங்கள் அனைத்துமே ஒரு மனிதனை மகிழ்ச்சியாக வாழவைக்க உதவும் அம்சங்கள்.

- -டாக்டர் அகிலாண்ட பாரதி- டாக்டர் தேவி பிரபா

நேர்மறை உளவியல் என்ற கருத்தியல் உலகில் வலுப்பெறத் துவங்கியதில் இருந்து உலகெங்கும் பல வல்லுனர்கள் அதைக் குறித்து ஆராய்ச்சிகள் செய்ய ஆரம்பித்தனர்.

நீண்டகால ஆராய்ச்சிகள், எழுத்துக்கள் இவற்றின் முடிவில் உலக அளவில் நேர்மறை உளவியலின் தூண்கள் என்று சில அம்சங்கள் ஏற்றுக் கொள்ளப்பட்டிருக்கின்றன. அவற்றில் மூன்று தூண்கள் குறிப்பிடத் தகுந்தவை.

நேர்மறை அனுபவங்கள், நேர்மறை எண்ணங்கள் மற்றும் நேர்மறையான சுற்றுப்புறம். இந்தத் தூண்களை வலுப்படுத்தினால் மனம் மகிழ்ச்சியாகவே இருக்கும் என்பது அனைவராலும் ஏற்றுக்கொள்ளப்பட்ட ஒன்று.

உளவியலின் அம்சங்களைப் பலப்படுத்த அந்தந்த நாட்டு மக்களின் கலாச்சாரத்திற்கு ஏற்பவும், தனிநபரின் வாழ்க்கை முறை, வளர்ந்த விதம் இவற்றிற்கு ஏற்பவும் பல வழிமுறைகள் வகுக்கப்பட்டு இருக்கின்றன.

முதலில் நேர்மறை அனுபவங்களை எடுத்துக் கொள்வோம். அனுபவங்கள் என்பவை தனிமனிதன் சார்ந்தவை. ஒரு வீட்டில் நான்கு நபர்கள் இருக்கிறார்கள். ஒருவர் அந்த ஆண்டில் நிறைய வெற்றிகளை குவித்திருக்கிறார், நிறைய சுற்றுலாக்கள் சென்று இருக்கிறார்கள். ஆண்டு முழுவதும் எந்த சண்டை சச்சரவும் இல்லாமல் புன்னகையுடனே கழித்திருக்கிறார். இது குறுகிய காலத்திற்கானதாகவோ, நீண்டகாலத்திற்கானதாகவோ இருக்கலாம்.

சுறுசுறுப்பாக இருப்பது, பிறர் மேல் அன்பு செலுத்துவது, பிறரின் அன்பை ஏற்றுக் கொள்வது, தன்னம்பிக்கையுடன் இருப்பது, எதிர்காலத்தைப் பற்றிய திட்டங்கள், வளர்ச்சியை நோக்கிய முயற்சி... இவை எல்லாவற்றையும் குறிப்பிட்ட காலத்தில் எப்படியானவையாக இருந்தன என்பதை நாம் யோசித்துப் பார்த்தால், புரியும்.

உதாரணமாகச் சொல்லப் போனால், எப்படி இருக்கீங்க என்று ஒருவர் உங்களைக் கேட்கும் போது, நல்லா இருக்கேன்! எல்லாரும் என் மேல் அன்பா இருக்காங்க! நான் அடுத்ததா ஒரு பேங்க் எக்ஸாம்க்கு ப்ரிப்பேர் பண்ணிக்கிட்டு இருக்கேன், கண்டிப்பா வேலை கிடைச்சுடும்! என்று சொல்கிறார் குடும்பத்தில் ஒருவர்.

இன்னொருவரோ இந்த வருஷம் முழுக்க ஒரே அலைச்சல், கம்பெனியில் நிலைமை சரியில்லை, அதனால ஸ்ட்ரெஸ் என்கிறார். இவையெல்லாம் ஒரு வருடம் அல்லது இரண்டு வருடங்களாக நாம் நன்றாக இருக்கிறோமா என்பதைக் குறிப்பது.