மின்னல் பலிகள்....அதிகரிப்பது ஏன்?

இயற்கைப் பேரழிவு தவிர்க்க முடியாதது. இப்படியான புயல், வெள்ளம், சூறாவளி, நிலநடுக்கம் போன்ற பேரிடர்களால் உயிர்பலிகளும் அதிகரித்து வருவதை பார்த்து வருகிறோம். ஆனால் யாராலுமே கணிக்க முடியாத அளவில் இடி, மின்னல் தாக்கி இறப்போர் எண்ணிக்கை இப்போது அதிகமாகி வருகிறது. அதிலும் சமீப காலமாக பீகாரில் பலி எண்ணிக்கை மிக அதிகமாக உள்ளது.

- -எஸ்.ரவீந்திரன்

புனேவில் அமைந்திருக்கும் இந்திய வானியல் நிறுவன ஆராய்ச்சி மையத் தகவலின்படி... பூமியில் இறங்கும் மின்னல்களின் எண்ணிக்கை அதிகமாவதால், அதன் தாக்குதலுக்கு ஆளாகி உயிரிழப்போரின் எண்ணிக்கையும் அதிகரிக்கிறது.

ஆண்டுதோறும் இந்தியாவில் 2,000க்கும் அதிகமானோர் மின்னல் பாய்ந்து உயிரிழக்கிறார்கள் என ஒரு புள்ளி விவரம் கூறுகிறது.

இது குறித்து மாநில பேரிடர் மேலாண்மைத் துறையின் ஆய்வில்... கடந்த 2016-ஆம் ஆண்டு முதல் 2025 ஏப்ரல் மாதம் வரை பீகாரில் 2,446 பேர் மின்னல் பாய்ந்து உயிரிழந்துள்ளனர்.

இதில் குறிப்பிடத்தக்க விஷயம் என்னவெனில் பீகாரின் தென் மத்திய பகுதியே மின்னல் பலிகள் அதிகம் நிகழ்ந்து வருகிறது என மாநில அரசின் அறிக்கை தெரிவிக்கிறது.

2024-ஆம் ஆண்டு மட்டும் பீகாரில் 303 பேர் மின்னல் பாய்ந்ததில் உயிரிழந்தனர். இவர்களில் 219 பேர் அந்த மாநிலத்தின் தென் மத்திய பகுதியைச் சேர்ந்தவர்கள்.

இப்படியான மின்னல் பலிகள் ஏற்பட காரணம் என்ன?

பொதுவாக, வளிமண்டலத்திலுள்ள வாயுக்கள் சந்திக்கும் அதிர்வலைகளின் விளைவுதான் இடி. இதில் மூன்று வகைகள் உள்ளன. முதலாவது, மேகத்துக்கு உள்ளேயே நடக்கும். இரண்டாவது, ஒரு மேகத்துக்கும் மற்றொரு மேகத்துக்கும் இடையே நடைபெறும். இதில் மின்னல் ஒரு மேகத்திலிருந்து இன்னொரு மேகத்துக்குத் தாவும்.

மூன்றாவது வகையில், ஒரு மேகத்தில் ஏற்படுகின்ற மின்னல், அதிலிருந்து கீழிறங்கி நிலத்தில் இறங்கும். இந்த மூன்றாவது வகைதான், மிகவும் ஆபத்தான, உயிரைப் பறிக்கக் கூடிய மின்னல்.