தர்மயுத்த நாயகர்களின் புது கட்சி, புது ரூட்?

அகில உலக அளவிலும், இந்திய ஒன்றிய அளவிலும் தமிழ்நாட்டளவிலும் 3 பேர் புது ரூட் போட்டு புதுக்கட்சி தொடங்கியும் தொடங்காமலும் திண்டாடிக் கொண்டிருக்கின்றனர்.

- -பரிதி

ஜெயலலிதாவால் ஆசீர்வதிக்கப்பட்டு, அவர் மரணத்துக்கு பின் முதல்வர் பதவியை அலங்கரித்த ஓ.பி.எஸ்., ஒரு தருணத்தில் பதவியை விட்டுக்கொடுக்க வேண்டிய சந்தர்ப்பம் வந்தபோது, தர்ம சங்கடமாகிவிட்டது.

உடனே சென்னை மெரினாவில் உள்ள ஜெயலலிதாவின் நினைவிடத்துக்கு சென்று தியான நிலையில் அமர்ந்தார்.

அப்போது செய்தியாளர்களிடம் பேசியவர், முதல்வர் பதவியில் இருந்து விலக வேண்டும் என கட்டாயப்படுத்தியதால் ராஜினாமா செய்தேன் என கண்ணீர் மல்க கூறியதுடன், தான் சசிகலாவை எதிர்த்து தர்ம யுத்தம் தொடங்கி உள்ளதாகவும் பிரகடனம் செய்தார். இதுதான் ஓ.பி.எஸ். நடத்திய முதல் தர்ம யுத்தம்.

சொத்துக் குவிப்பு வழக்கில் சசிகலா சிறைக்கு சென்ற நிலையில்...

கூவத்தூர் ரிசார்ட்டில் முதல்வராக பட்டாபிஷேகம் செய்யப்பட்ட எடப்பாடியின் முதல்வர் பதவிக்கு டி.டி.வி. தினகரனால் ஆபத்து வந்தபோது... அந்த ஆட்சிக்கு முட்டுக் கொடுத்ததுடன் ஓ.பன்னீர்செல்வத்தின் முதலாவது தர்ம யுத்தம் முடிவுக்கு வந்தது.

ஒருகட்டத்தில் ஓ.பி.எஸ்.-இ.பி.எஸ். அணிகள் என அ.தி.மு.க. பகிரங்கமாகவே பிளவுபட்டுவிட்டது. அந்த சூழ்நிலையில் ‘தர்ம யுத்தம் பார்ட் டூ'வை தொடங்கினார் ஓ.பி.எஸ்.

அப்போது 'அ.தி.மு.க.வை மீட்கும் வரை ஓயமாட்டோம்’ என சபதம் எடுத்தார்.

ஆனாலும், எடப்பாடி சாதுர்யமாக காய் நகர்த்தி, அ.தி.மு.க.வை கைப்பற்றியதோடு, அதன் பொதுச்செயலாளராகவும் முடிசூட்டிக் கொண்டார்.

அதன் பின்னும் வேறு வழியின்றி, திருச்சியில் கூட்டம் கூட்டி தொண்டர்கள் உரிமையை மீட்கும் தர்ம யுத்தத்தை தொடர்ந்தார். பின்பு தொண்டர்களும் நழுவி விட்டதால் தொண்டர்களை மீட்கும் தர்ம யுத்தம் நடத்த முடியாமல் தவித்தார்.

இப்போது எப்படியாவது தன்னை கட்சியில் இணைத்துக் கொள்ள தர்ம யுத்தம் நடத்துகிறார்.

இதற்கிடையே மோடி, அமித்ஷாவை எப்படியாவது சந்திக்க வேண்டும் என்ற தர்மயுத்தம் வேறு நடக்கிறது.