குறைந்துவரும் பாரம்பரிய பலா சாகுபடி!

கல்வராயன் மலைக் கிராமங்களில் முதிர்ந்த பலா மரங்கள் வெட்டப்படுவதோடு, புதிய மரங்கள் நடவு செய்வதில் ஆர்வமின்மையால், பாரம்பரிய முறை பலா சாகுபடி குறைந்து வருகிறது.

- பெ.பெரியார்மன்னன்

வாழப்பாடி, ஜூன் 24:

மரச் சாமான்களுக்காக பலா மரங்கள் வெட்டப்படுவதைத் தடுக்கவும், பலா மரங்களைப் பயிரிட்டுச் சாகுபடியை அதிகரிக்கவும் விவசாயிகளுக்குப் போதிய விழிப்புணர்வு ஏற்படுத்தத் தோட்டக்கலை மற்றும் வனத்துறை அதிகாரிகள் கவனம் செலுத்த வேண்டுமென இயற்கை ஆர்வலர்கள் வேண்டுகோள் விடுத்துள்ளனர்.

சேலம், கள்ளக்குறிச்சி, விழுப்புரம், தருமபுரி மற்றும் திருவண்ணாமலை மாவட்டங்களை இணைக்கும் வகையில் பரந்து காணப்படும் சின்ன கல்வராயன் மற்றும் பெரிய கல்வராயன் மலை, அருநூற்றுமலை, சந்துமலை, நெய்யமலை ஆகிய கிராமங்களில் பலா சாகுபடிக்கு ஏற்ற மண் வளமும், சூழ்நிலையும், மழைப்பொழிவும் தொடர்வதால் நீண்டகாலப் பலன்தரும் பலா மரங்களை மலைவாழ் பழங்குடியின மக்கள் வழிவழியாகப் பல நூற்றாண்டுகளாகச் சாகுபடி செய்து வருகின்றனர்.