வங்கதேசத்தில் ஹிந்து அமைப்பின் தலைவர் படுகொலைக்கு இந்தியா கடும் கண்டனம்

வங்கதேசத்தில் சிறுபான்மையினரான ஹிந்து சமூகத்தைச் சேர்ந்த ஒரு தலைவர் கடத்தி படுகொலை செய்யப்பட்ட சம்பவத்துக்கு இந்தியா கடும் கண்டனம் தெரிவித்தது.

- 

புது தில்லி, ஏப். 19:

மேலும், சிறுபான்மையினரை பாதுகாக்க வேண்டிய பொறுப்பை நிறைவேற்றுமாறு வங்கதேச இடைக்கால அரசுக்கு இந்தியா வலியுறுத்தியது.

வங்கதேசத்தில் செயல்படும் ஹிந்து அமைப்பான வங்கதேச பூஜா உத்யாப பரிஷத்தின் பிரால் பகுதி துணைத் தலைவராக இருந்தவர் பாபேஷ் சந்திர ராய் (58). தினாஜ்பூர் மாவட்டத்தின் வாசுதேவ்பூரில் உள்ள தனது வீட்டில் வியாழக்கிழமை இருந்தபோது, மோட்டார் சைக்கிளில் வந்த 4 பேர் அவரை கடத்தி சென்று கொடூரமாக தாக்கிக் கொலை செய்தனர்.

வங்கதேசத்தில் சிறுபான்மையினரான ஹிந்துக்கள் மீதான தாக்குதல்கள் தொடர்கதையாகிவரும் நிலையில், ஹிந்து தலைவர் கொலைச் சம்பவம் நிகழ்ந்தது.

இது தொடர்பாக இந்திய வெளியுறவு அமைச்சக செய்தித் தொடர்பாளர் ரண்தீர் ஜெய்ஸ்வால் சனிக்கிழமை வெளியிட்ட எக்ஸ் பதிவில் கூறியிருப்பதாவது: வங்கதேசத்தில் சிறுபான்மை ஹிந்து சமூகத் தலைவர் பாபேஷ் சந்திர ராய் கடத்தப்பட்டு, கொடூரமாகக் கொலை செய்யப்பட்ட சம்பவத்தை வேதனையுடன் கவனத்தில் கொண்டுள்ளோம்.