તુર્કીયેમાં અર્દોગાનના અંતનો આરંભ?

કાવાદાવા અને બળજબરીથી પાવરને વળગી રહેલા અર્દોગાન હવે લાંબું નહીં ખેંચી શકે. અર્દોગાનના હરીફ ઇમામોગ્લુની ધરપકડથી પરિસ્થિતિ વણસી છે.

- ગૌરાંગ અમીન

તુર્કીયેમાં સતત ૧૧મી વખત ચૂંટણી જીતી રેસેપ તૈયપ અર્દોગાન ફરી રાષ્ટ્રપતિ બન્યા હતા. તેમને ૫૨% અને તેમના હરીફને ૪૮% ટકા વોટ મળેલા. ૨૦૨૩ના એ ન્યૂઝમાં વધુ ઉમેરેલું હતું કે અગાઉ ૧૪મેના રોજ અનિર્ણાયક મતદાન થયું હતું, તેથી બીજા રાઉન્ડનું આયોજન થયેલું. અર્દોગાને વિપક્ષી નેતા કમાલ કલચદારલુને બીજા રાઉન્ડના રન-ઑફમાં હરાવીને બહુમતી મેળવેલી. જસ્ટિસ એન્ડ ડેવલપમેન્ટ પાર્ટીના મુખિયા અર્દોગાનને પ્રથમ રાઉન્ડમાં ૪૯.૪% મત મળ્યા હતા. ત્યારે જ વિશ્વએ સમજવાનું હતું કે ડોનની જેમ બૉસિઝમ કરવા મથ્યા કરતાં અર્દોગાન એકદમ પાતળી બહુમતીથી માંડ-માંડ જીત્યા હતા. એ પહેલાંના સમાચાર એવા હતા કે, તેઓ પુતિનના ઇશારે સરકાર ચલાવી રહ્યા છે. નવેમ્બર ૧૯માં થનાર ઇલેક્શન એમણે ગમે તેમ કરી લેટ કર્યું. ત્યારે પણ પ્રજાનો નોંધપાત્ર રીતે મોટો ભાગ અર્દોગાનની નીતિઓથી અસંમત હતો. તે વિરોધ કરનારા પત્રકારો, ફિલ્મકારો, લેખકોને જેલમાં મોકલતા રહ્યા છે. સાથે દેશમાં જે સાક્ષર લોકો છે તેમના માટે એવી સ્થિતિ કરી દીધી છે કે તે દેશ છોડીને જતા રહે. વળી, બહારથી આવેલા બુદ્ધિમાનોના વિઝા રદ કરવામાં આવે છે. તુર્કીયમાં શિક્ષિત સાથે ધંધાદારી વર્ગ પણ વિરોધમાં છે. અતઃ ગંભીરતાથી એવી ગણતરી મૂકાઈ રહી છે કે, સરમુખત્યારી કાવાદાવા વડે બળજબરીથી પાવરને વળગી રહેલા અર્દોગાન હવે લાંબું નહીં ખેંચી શકે.