ഡെക്കാനിലും അവക്കാഡോ

പ്രതികൂല പ്രദേശങ്ങളിലും പ്രീമിയം അവക്കാഡോ കൃഷി ചെയ്യുന്ന ഡോ. ശ്രീനിവാസ് റാവു

- 

കഴിഞ്ഞ വർഷം 10,000 ടൺ ആയിരുന്നു ഇന്ത്യയിൽ അവക്കാഡോ ഉപഭോഗമെങ്കിൽ 2026-27 ൽ നാം പ്രതീക്ഷിക്കുന്നത് 40,000 ടൺ ആണ്. അത്രവേഗം വളരുകയാണ് നമ്മുടെ വിപണി. അവക്കാഡോ ഉൽപാദക രാജ്യങ്ങൾ കണ്ണു വച്ചിരിക്കുന്ന ഏറ്റവും വലിയ വിപണിയും ഇന്ത്യ തന്നെ. എന്നാൽ, അവക്കാഡോ ഉൽപാദനത്തിൽ നാം ഇന്നും ചിത്രത്തിലെങ്ങുമില്ല. വരും വർഷങ്ങളിലെങ്കിലും ഈ മേഖലയിൽ നമുക്ക് എന്തെങ്കിലുമൊരു നേട്ടമുണ്ടാകണമെങ്കിൽ ഇപ്പോഴെ ശ്രമിക്കണം''. തെലങ്കാനയിൽ ഹൈദരാബാദിനടുത്ത് സംഗറെഡ്ഡിയിലുള്ള അവക്കാഡോ കൃഷിയിടത്തിൽ നിന്നുകൊണ്ട് അവക്കാഡോയുടെ കൃഷി, യോജിച്ച ഇനങ്ങൾ, ഓരോന്നിന്റെയും മേന്മകൾ, രാജ്യാന്തര വിപണി എന്നിവയെക്കുറിച്ചെല്ലാം ആധികാരികമായി സംസാരിക്കുന്ന ഡോ.ശ്രീനിവാസ് റാവു കാർഷിക ശാസ്ത്രജ്ഞനോ മുഴുവൻ സമയ കർഷകനോ അല്ലെന്നതാണ് കൗതുകം. ഫിസിഷ്യനാണ് അദ്ദേഹം. എംബിബിഎ സും ജനറൽ മെഡിസിനിൽ എംഡിയും ഇൻഫെക്ഷനൽ ഡിസീസിൽ സൂപ്പർ സ്പെഷ്യൽറ്റിയും തുടർന്ന് ഓക്സ് ഫോഡിൽനിന്ന് ഉപരിപഠനവും കഴിഞ്ഞെത്തിയ തിരക്കുള്ള ഡോക്ടർ.

ഡോക്ടർക്കെന്താണ് അവക്കാഡോ കൃഷിയിൽ കാര്യം എന്നു ചോദിച്ചാൽ അവിടെയും ചർച്ച ആരോഗ്യം തന്നെ'യെന്ന് അദ്ദേഹം പറയും. “ഹൃദയാഘാതസാധ്യത കുറയ്ക്കാൻ കഴിക്കുന്ന ഗുളികയ്ക്ക് 23 ശതമാനമാണ് അതിനെ തടയാൻ കഴിയുക. അതേ കാര്യത്തിൽ അവക്കാഡോയുടെ കഴിവ് അതിനു തൊട്ടടുത്തു വരും. അവക്കാഡോയുടെ ആരോഗ്യമേന്മകൾ കണക്കിലെടുത്താൽ ഇന്നു വിപണിയിൽ ഇതിനൊപ്പം മൂല്യമുള്ള മറ്റൊരു പഴമില്ലെന്ന് ഉറപ്പിച്ചു പറയാം. എല്ലാ അർഥത്തിലും പ്രീമിയം ഫ്രൂട്ട്. എന്നാൽ, അതിന്റെ കൃഷിയോ അതിലൂടെ വരാവുന്ന വൻ വരുമാന സാധ്യതയോ സംബന്ധിച്ച് നമ്മുടെ കർഷകരോ കാർഷിക ഗവേഷകരോ കാര്യമായി ചിന്തിക്കുന്നില്ല.

അവക്കാഡോയുടെ ഏതെങ്കിലും ഇനം കൃഷി ചെയ്തിട്ടു കാര്യവുമില്ല. രാജ്യാന്തര വിപണിയിൽ വിലയും മൂല്യവുമുള്ള ഇനം തന്നെ ചെയ്യണം'', സംഗറെഡ്ഡിയിൽ, 5000 അവക്കാഡോ മരങ്ങൾ വളരുന്ന വിശാലമായ തോട്ടത്തിലിരുന്ന് ഡോ.ശ്രീനിവാസ് റാവു പറയുന്നു. അവക്കാഡോ ഇനങ്ങളിൽ ഏറ്റവും മികച്ചതെന്നു പറയുന്നതും സമുദ്രനിരപ്പിൽനിന്നു വളരെ ഉയർന്ന പ്രദേശങ്ങളിൽ മാത്രമേ വിളയൂ എന്നു കരുതപ്പെടുന്നതുമായ ഹാസ് ഉൾപ്പെടെ ലോകത്തു കൃഷി ചെയ്യുന്ന മിക്ക ഇനങ്ങളും കാണാം ഡോക്ടറുടെ തോട്ടത്തിൽ.