രാജകുമാരിയിലെ രാജകുമാരൻ

ഇടുക്കിയിലെ രാജകുമാരിയിലേക്ക് ടൊയോട്ടയുടെ രാജകുമാരനിൽ ഒരു യാത്ര

- സുനിഷ് തോമസ്

എവിടേക്കാണ് എന്നു ചോദിക്കരുത്. കാരണം അതിന് ഈ യാത്രയിൽ വലിയ പ്രസക്തിയില്ല. പകരം ഏതാണു വണ്ടി എന്നു ചോദിക്കൂ. അതിലാണ് കഥയുടെ കാമ്പിരിക്കുന്നത്.

ടൊയോട്ട ഫോർച്യൂണറിലാണ് ഈ ടിപ്. ആനപ്പുറത്ത് ഇരുന്ന് ഉത്സവം കൂടുന്ന ആലവട്ടക്കാരന്റെ കാഴ്ചയാണ് ടൊയോട്ട ഫോർച്യൂണറിന്റെ ഡ്രൈവിങ് സീറ്റിൽ. റോഡിൽ ബഹുമാനം വിലകൊടുത്തു വാങ്ങാമെന്നു പഠിപ്പിക്കും ഈ ഫോർവീൽ ഡ്രൈവ് മസിൽമാൻ എവി. മുന്നിലുള്ള ഏതെങ്കിലുമൊരു വണ്ടിയുടെ പിന്നിൽ ചെന്ന് ഓണടിക്കും മുൻപേ അവരുടെ റിയർ ഗ്ലാസിൽ ഒരു നിഴൽ കണ്ടാൽ മതി. സൂപ്പർ ഫാസ്റ്റ് ബസ് വരെ സൈഡ് തന്ന കഥ പറയാനുണ്ടാകും ഓരോ ഫോർച്യൂണറിനും.

എങ്ങോട്ടാ?

തമിഴ്നാട്ടിൽ എവിടേക്കെങ്കിലും എന്ന പ്ലാനുമായി പുലർച്ചെ കോട്ടയത്തുനിന്നു പുറപ്പെട്ടതാണ്. പാലാ കഴിഞ്ഞപ്പോൾ മുതൽ വഴിയിൽ ഇടുക്കി മോഡൽ കോട മഞ്ഞ്. തമിഴ്നാട്ടിലെ നിരപ്പുവഴികളിലൂടെ വണ്ടിയോടിക്കണോ അതോ അൽപം വളവും തിരിവും കുണ്ടും കുഴിയുമൊക്കെ യുള്ള ഹൈറേഞ്ചിലേക്കു പോകണോ എന്നായി ആലോചന. ഈരാറ്റുപേട്ടയിൽ എത്തിയപ്പോൾ ഫോർച്യൂണർ വാഗമൺ റോഡിലേക്കു തിരിഞ്ഞു. വാഗമൺ, കട്ടപ്പന വഴി ഇടുക്കിയുടെ ഇടനെഞ്ചിലേക്കാവട്ടെ ഈ ട്രിപ്പെന്നുറപ്പിച്ച് കാലുകൊടുത്തു. അതിവേഗം ബഹുദൂരമെന്ന പഴയ സർക്കാ ർ പരസ്യത്തിലേതെന്നപോലെ ഫോർച്യൂണർ വാഗമൺ ടൗണും പിന്നിട്ട് ഉപ്പുതറ വഴി കട്ടപ്പനയിലേക്ക്.

അറിയപ്പെടാത്ത വാഗമൺ

ഇടുക്കി ജില്ലയിലെ ഇനിയും അറിയപ്പെടാ ത്ത വാഗമൺ വഴിയാണ് ഈ കട്ടപ്പന റൂട്ട്, ഓരോ വളവിലും ഫെയിം ചെയ്തുവയ്ക്കാ വുന്ന ഒരായിരം കാഴ്ചകൾ. പുലർമഞ്ഞ്, പുൽമേട്, കരിമ്പാറക്കെട്ട്, കൊടുംകൊക്ക എന്നു തുടങ്ങി ഹൈറേഞ്ചിൽ കാണാൻ പറ്റുന്നതെല്ലാം ഓരോ തിരിവിലും ഓരോരോ ഫ്രെയിമായി യാത്രയിലേക്കു കയറിവരും.