നീലാകാശം, ചുവന്ന മരുഭൂമി

തമിഴ്നാട്ടിലെ ചുവന്ന മരുഭൂമിയായ തെരിക്കാട്, വെളുത്ത മണൽ ക്കുന്നുകളുടെ മണപ്പാട്, കടൽത്തീരത്തെ ഒരേയൊരു മുരുകൻ ക്ഷേത്രമായ തിരുച്ചെന്തൂർ... കിയ കാരൻസ് ക്ലാവിസിന്റെ ഒറ്റയാത്രയിലെ അത്ഭുതക്കാഴ്ചകളിലൂടെ...

- സുനിഷ് തോമസ്

തെറി എന്നും തെരി എന്നുമൊക്കെ വിളിച്ചാൽ തമിഴ്നാട്ടിൽ അതൊരു തെറിവാക്കല്ല എന്ന് ആദ്യമേ പറഞ്ഞക്കാം. കാരണം, ഇപ്പോൾ കാലുചവിട്ടി നിൽക്കുന്നത് ഒരു തെറിക്കാട്ടിലാണ്.

ദക്ഷിണേന്ത്യയിലെ ചുവന്ന മരുഭൂമി. കണ്ണെത്താപ്പരപ്പിൽ ചുവന്ന മണൽക്കൂനകൾ. അജ്ഞാതമായ ഏതോ ഭൂമിയിൽ ചെന്നുപെട്ടുപോയതിന്റെ അമ്പരപ്പോടെ നിൽക്കും നേരത്തു ദിക്കറിയാതെ വീശിയെത്തുന്ന കാറ്റ്, പേടിപ്പെടുത്തുന്ന ശബ്ദത്തിൽ മണൽക്കൂനകളിൽ ആഞ്ഞടിച്ച് കാറ്റു കടന്നുപോയാൽ പിന്നെ ഗൂഢമായ നിശ്ശബ്ദത.

തമിഴ്നാട്ടിലെ ചുവന്ന മരുഭൂമിയാണ് തെരിക്കാട്. തൂത്തുക്കുടി ജില്ലയിൽ 12,000 ഏക്കർ വിസ്തൃതിയിൽ പരന്നുകിടക്കുന്ന ചുവന്ന മണൽക്കൂനകളുടെ നാട്. സമുദ തീരത്തു സ്ഥിതിചെയ്യുന്ന പ്രകൃതിദത്ത മരുഭൂമിപ്രദേശം എന്നു തെരിക്കാടിനെ നിർവചിക്കാം. 'തെരി' എന്നത് ചുവപ്പ് മണൽക്കുന്നുകളെ വിളിക്കുന്ന തമിഴാക്കാണ്. “കാട് എന്നത് കാടിനെയും സൂചിപ്പിക്കുന്നു. ഇങ്ങനെ ചേർന്നതുകൊ ണ്ട് “തെരി കാട്' എന്നത് മണൽക്കാടുകൾ എന്നു വിവർത്തനം ചെയ്യാം. അയൺ ഓക്സൈഡ് ഉൾപ്പെടെയുള്ള ലോഹ സംയുക്തങ്ങളുടെ സാന്നിധ്യം മൂലമാണ് തെരിക്കാട്ടിലെ മണലിനു ചുവപ്പുനിറം കിട്ടിയത്. പലതരം ചെടികളും ചെറിയ കാടുകളും പൂമ്പാറ്റകളും മരംകൊത്തികളും പല്ലികളും വണ്ടുകളുമൊക്കെയാണ് ഈ കാട്ടിലുള്ളത്. എപ്പോഴും വീശാറുള്ള കാറ്റ് രൂപപ്പെടുത്തിയതാണ് ഇത്തരമൊരു ഭൂപ്രകൃതി. സാധാരണ മരുഭൂമികളിൽ കാറ്റുവീശുമ്പോൾ മണൽക്കുന്നുകൾക്ക് സ്ഥാനവും രൂപവും മാറുന്നതു പോലെ തെരിക്കാട്ടിലെ മണൽക്കുന്നുകൾക്കും രൂപമാറ്റം സംഭവിക്കാറുണ്ടത്രേ!

റീൽസിൽ നിന്ന് റിയൽസിലേക്ക്

ഇൻസ്റ്റഗ്രാമിൽ എവിടെയോ കണ്ട റീൽസിൽ നിന്നു കണ്ണെടുക്കാതെ നോബിളാണ് അതു ചോദിച്ചത്: "നമുക്കു തെരിക്കാട്ടിലേക്കു വിട്ടാലോ?' തമിഴ്നാട്ടിലാണ്, തിരുച്ചെന്തൂരിനു 15 കിമീ ചുറ്റളവിൽ എവിടെയോ... ഗൂഗിളിൽ വഴി കാണിക്കുന്നുണ്ട്.

അതിരാവിലെ, എങ്ങോട്ടു പോകണമെന്ന സന്ദേഹത്തിനുമേൽ വീണ സന്ദേശമായി ആ ചോദ്യം.

മറുപടി പറയും മുൻപേ കിയ ക്ലാവിസിന്റെ ഇൻസ്ട്രമെന്റ് പാനലിലേക്കു നോക്കി. ആവശ്യത്തിനു പെട്രോളുണ്ട്. വേഗത്തിലോടാൻ 6 ഗിയറും വിശാലമായിട്ടിരിക്കാൻ 7 സീറ്റുമുള്ള വണ്ടിയാണ്. പിന്നെന്തു വേണം? കിയ കാരൻസിന്റെ ഫേസ് ലിഫ്റ്റ് പ്രീമിയം വേർഷനായ ക്ലാവിസ് അങ്ങനെ ശബ്ദമുണ്ടാക്കാതെ പറന്നെത്തിയതാണു തെരിക്കാട്ടിൽ.