എഎം- ഒരു പുതിയ വേരിയന്റ്

COFFEE BREAK

-  വിനോദ് നായർ

രാത്രി തന്റെ കാറിനു മുന്നിൽ ഒരു ലോറി സഡൻ ബ്രേക്കിട്ടു. സോമൻ പേഴ്സ് എടുത്തു ഐഡന്റിറ്റി കാർഡ് ഉണ്ടെന്ന് ഉറപ്പുവരുത്തി... ഏബ്രഹാം മാത്യുവിന്റെ ഒരു കഥയിലെ വാചകങ്ങളാണിത്.

കഥാകൃത്തായ ഏബ്രഹാം മാത്യുവിന് സുഹൃത്തുക്കൾക്കിടയിൽ വാഹന പ്രേമി എന്ന ഐഡന്റിറ്റി കാർഡ് കൂടിയുണ്ട്. അദ്ദേഹത്തിന്റെ ഐഡന്റിറ്റി കാർ കൂടിയാണെന്ന് അദ്ദേഹത്തെ കാണുമ്പോഴൊക്കെ തോന്നും. അദ്ദേഹം ഇതുവരെ ഉപയോഗിച്ച വാഹനങ്ങൾ എണ്ണാൻ തുടങ്ങിയാൽ കയ്യിലെ പത്തു വിരലുകൾ പോരാ. പുതിയ പുതിയ മോഡലുകളോടാണ് എന്നും താൽപര്യം. കാർമാർഗം എന്ന പേരിൽ ഒരു കഥാ സമാഹാരവുമുണ്ട്.

പത്രപ്രവർത്തനത്തിന്റെ തുടക്കകാലത്ത് ഒരു തണുത്ത വെളുപ്പാൻകാലത്ത് അദ്ദേഹം നൈറ്റ് ഡ്യൂട്ടി കഴിഞ്ഞ് കാറോടിച്ച് വീട്ടിലേക്കു പോവുന്നു. തിരുവല്ലയിലെ പുല്ലാട് എത്തിയപ്പോൾ റോഡരികിൽ എന്തോ ഒരു വെളുത്ത വസ്തു. അദ്ദേഹം കാർ നിർത്തി. റോഡിൽ ഒരാൾ വേദന കൊണ്ടു പുളയുന്നു. തലയിട്ട് ഉരുട്ടുന്നു. ഭയം തോന്നി. അപകടസ്ഥലത്തു നിന്ന് പൊയ്ക്കളയാൻ തലച്ചോർ നിർബന്ധിക്കുന്നു. വേഗം കാറിൽ കയറി. വീണ്ടും ഒരു കരച്ചിൽ അതുകേട്ട് ഹൃദയം പറഞ്ഞു; "ഏബ്രഹാമേ നീ പോകരുത്. രക്തത്തിൽ കളിച്ചു കിടന്നയാളെ വേഗം എടുത്തു കാറിലിട്ട് അടുത്ത ആശുപത്രിയിലാക്കിയിട്ടാണ് ഏബ്രഹാം മാത്യു മടങ്ങിയത്. ആരാണെന്നറിയാത്തയാളെ കാറിൽ കയറ്റിയ എബ്രഹാം മാത്യുവിന് എല്ലാവരും അറിയുന്ന ചിലരെ കാറിൽ കൂടെയിരുത്തിയ കഥകളും പറയാനുണ്ട്. ഒരാളെ ഇന്റർ വ്യൂ ചെയ്യാൻ ഏതെല്ലാം മാർഗങ്ങളുണ്ട്.