High Voltage

ഫോർവീൽ ഡ്രൈവ് സാങ്കേതികവിദ്യയും ഉഗ്രൻ ഡ്രൈവ് റൈഡ് ക്വാളിറ്റിയും ലക്ഷ്വറി കാറുകളിൽ മാത്രം കണ്ടുവന്ന ഫീച്ചറുകളും ഒക്കെയായി വിപണിയിലെ താരമാകാൻ ഹാരിയർ ഇവി

- നോബിൾ എം. മാത്യു

ഹാരിയർ ഇവി സോഷ്യൽ മീഡിയയിൽ ഈയടുത്ത കാലത്ത് ഇത്രയും ഓളമുണ്ടാക്കിയ ഒരു മോഡൽ ഉണ്ടാകില്ല. വാഗമണ്ണിലെ ആനപ്പാറയിലേക്കു കയറുന്ന പരസ്യം മുതൽ ഹാരിയർ ഹിറ്റാണ്. ഒരുകോടിയോളം രൂപ വിലവരു ന്ന വാഹനങ്ങളിലെ ഫീച്ചറുകൾ നാൽപതു ലക്ഷത്തിന്റെ ഹാരിയറിൽ കിട്ടും എന്നതും ട്രാക്കിലെയും ഓഫ്റോഡിലെയും കിടിലൻ പെർഫോമൻസുകളും വാഹനപ്രേമികളുടെ ഇടയിൽ ഹാരിയറിനെ ഹോട്ട് താരമാക്കി.

റോഡിൽ ഹാരിയർ എങ്ങനെ എന്ന ചോദ്യം അപ്പോഴും ബാക്കിയായിരുന്നു. ഫരീദാബാദിലെ തിരക്കേറിയ റോഡുകളിലും നാട്ടു വഴികളിലും എക്സ്പ്രസ് വേയിലും ഹാരിയറുമായി ഡ്രൈവ് ചെയ്ത വിശേഷങ്ങളിലേക്ക്...

ആനച്ചന്തം

ലക്ഷണമൊത്തൊരു കരിവീരൻ. അല്ലെങ്കിൽ ഒരു പാറ്റൺ ടാങ്ക്. ഹാരിയർ ഇവിയെ നോക്കുമ്പോൾ ഇതുരണ്ടുമാണു തോന്നുക. വലുപ്പം തന്നെയാണ് പെട്ടെന്നു ശ്രദ്ധിക്കുക. ഹാരിയറിന്റെ ഐസ് (ICE-Internal cumbustion engine, പെട്രോൾ, ഡീസൽ എൻജിനുകളെ ഐസ് എൻജിനുകൾ എന്നാണു പറയുന്നത്) മോഡലിനോടു സാമ്യമുള്ള ഡിസൈൻ. ഒറ്റനോട്ടത്തിൽ അതു താനല്ലയോ ഇതെന്നു തോന്നുന്ന രൂപം. അടഞ്ഞ ഗ്രില്ലും പരിഷ്ക രിച്ച ബംപർ ഡിസൈനും ഇവിക്ക് വേറിട്ട മുഖം നൽകുന്നു. നേർത്ത എൽഇഡി ഡിആർഎൽ പ്രകാശിക്കുന്നതു കാണാൻ ചന്തമുണ്ട്. ബംപറിലെ എയർ ഇൻടേക് സെക്ഷനിലെ ക്രോം ഫിനിഷും കൊള്ളാം. മസ്കുലർ ബോണറ്റ്. ഇതിനടിയിൽ ചെറിയ സ്റ്റോറേജ് സ്പേസുണ്ട്. വശങ്ങളിലെ മാറ്റം പുതിയ എയ്റോ വീലുകളാണ്. 19 ഇഞ്ച് ടയറുകൾ മാസ് ലുക്കാണു നൽകു ന്നത്. ഓട്ടത്തിൽ ഇതു കാണാൻ അതിമനോഹരം. പിൻവശത്ത് കാര്യമായ റീ ഡിസൈൻ ഒന്നുമില്ല. സി പില്ലറിൽ ക്വാഡ് വീൽ ഡ്രൈവ് ബാഡ്ജിങ്ങുണ്ട്. ക്വാഡ് വീൽ ഡ്രൈവ് എന്നാൽ ഫോർ വീൽ ഡ്രൈവ് എന്നു സാരം.

ക്ലാസ് ഇന്റീരിയർ

മൂന്നു രീതിയിൽ ഹാരിയർ ഇവി ലോക്ക് അൺലോക്ക് ചെയ്യാം. ഫിസിക്കൽ കീ, എൻഎഫ്സി കാർഡ്, ഡിജിറ്റൽ കീ. സാധാരണ കണ്ടുവരുന്നതിൽനിന്നു വ്യത്യസ്തമായി വട്ടത്തിലുള്ള ഫിസിക്കൽ കീയാണ്. ഇതിന് സമ്മോൺ മോഡുണ്ട്. അതായത്, ഈ ഫോബ് കീ ഉപയോഗിച്ച് കാറിനു പുറത്തുനിന്നു മുന്നോട്ടും പിറകോട്ടും നീക്കാം. മാത്രമല്ല, ഓട്ടോ പാർക്കും ചെയ്യാം. എൻഎഫ്സി കാർഡ് എടിഎം കാർഡ് പോലുള്ള ഒന്നാണ്. ബി പില്ലറിൽ മുട്ടിച്ചാൽ കാർ അൺലോക്കാകും. ഡിജിറ്റൽ കീ ഫോണിലെ ആപ്പ് വഴി പ്രവർത്തി ക്കുന്നതാണ്.