കുറ്റവും ശിക്ഷയും

റോഡപകടങ്ങളിൽ മരണം സംഭവിച്ചാൽ ശിക്ഷ കണക്കാക്കുന്നതെങ്ങനെ?

- കെ ദിലീപ് കുമാർ കെ ജി മോട്ടർ വെഹിക്കിൾസ് ഇൻസ്പെക്ടർ & ട്രെയിനിങ് കോഓർഡിനേറ്റർ ഇൻസ്റ്റിറ്റ്യൂട്ട് ഓഫ് ഡവർ ട്രെയിനിങ് ആൻഡ് റിസർച്ച് എടപ്പാൾ

*Your worst sin is that you have destroyed and betrayed yourself for nothing..." Dostoevsky-Crime and Punishment

അറിയില്ല സർ, വാഹനം ഇടിച്ചത് എന്റെ തെറ്റുകൊണ്ടാണ്. പക്ഷേ, അവർ കൊല്ലപ്പെട്ടത് എന്റെ തെറ്റല്ല, ഹെൽമറ്റ് വയ്ക്കാത്തതു കൊണ്ടാണ് ബസപകടത്തിനു കാരണക്കാരനായ ഡ്രൈവർക്കെതിരെ, പൊലീസ് കൊലപാതകത്തിന് എന്തിനു കേസ് എടുത്തു എന്ന ചോദ്യത്തിനുള്ള മറുപടിയായിരുന്നു അത്. ലൈസൻസ് സസ്പെൻഷനു ശേഷമുള്ള കറക്ടീവ് പരിശീലനത്തിന് എത്തിയതായിരുന്നു അയാൾ.

തിരക്കേറിയ വൈകുന്നേരം അമിതവേഗത്തിൽ വന്ന സ്വകാര്യ ബസ്, സ്റ്റോപ്പിലേക്ക് പാഞ്ഞുകയറിയതായിരുന്നു. തൊട്ടടുത്ത പഴക്കടയിൽ നിന്ന് സാധനങ്ങൾ വാങ്ങി, പോകാനായി സ്കൂട്ടറിൽ കയറിയ വൃദ്ധദമ്പതികളെ ഇടിച്ചു തെറിപ്പിച്ചിട്ടാണ് ബസ് നിന്നത്.

പിറകിലിരുന്ന സ്ത്രീ തെറിച്ച് വീണ്തല റോഡിലടിച്ച് തൽക്ഷണം കൊല്ലപ്പെട്ടു. മരണത്തിനു കാരണമാകുന്ന റോഡപകടങ്ങളിൽ സാധാരണ പ്രതിചേർക്കപ്പെടുന്നത് മനഃപൂർവമല്ലാത്ത നരഹത്യയ്ക്ക് ആയിരിക്കും. പക്ഷേ, ഇയാൾക്കെതിരെ കൊലപാതകത്തിനാണ് പൊലീസ് കേസ് റജിസ്റ്റർ ചെയ്തത്.

കൊലപാതകമാക്കപ്പെടുന്ന റോഡപകടങ്ങൾ

ഒരാളെ കൊല്ലാൻ, മുൻകൂട്ടി ആലോചിച്ച് ദുഷ്ടലക്ഷ്യത്തോടെ, മുന്നൊരുക്കവും ആസൂത്രണവും നടത്തി ജീവനെടുക്കുന്ന പ്രവൃത്തിയാണ് കൊലപാതകം. എന്നാൽ, കൊല്ലാനുള്ള ഉദ്ദേശ്യമോ ദേഷ്യമോ അതിനാവിശ്യമായ ആസൂത്രണം ഇല്ലാതെ അബദ്ധമായ പ്രവൃത്തികൊണ്ടു സംഭവിക്കുന്ന മരണമാണ് മനഃപൂർവമല്ലാത്ത നരഹത്യ. എന്നിട്ടും എന്തിനായിരിക്കും പൊലീസ് കൊലപാതകത്തിന് കേസ് റജിസ്റ്റർ ചെയ്തത്. ഇവിടെയാണ് ഡ്രൈവിംഗ് ലൈസൻസുള്ള ആളുടെ ഉത്തരവാദിത്തം എന്താണന്ന് മനസ്സിലാക്കേണ്ടത്.