റോഡ് റേജ് "വാക്കേറ്റവും നിരത്തിലെ കുരുക്കും'

റോഡിലെ തർക്കങ്ങൾ പലപ്പോഴും കൈവിട്ടുപോകാറുണ്ട്. വാക്കേറ്റത്തിലേക്കും കൊലപാതകത്തിലേക്കും വരെ അവ എത്തിച്ചേക്കാം. നമ്മുടെ മാനസികാവസ്ഥ മാറുകയാണോ?

- sദിലീപ് കുമാർ കെ ജി മോട്ടർ വെഹിക്കിൾസ് ഇൻസ്പെക്ടർ & ട്രെയിനിങ് കോഡിനേറ്റർ ഡ്രൈവർ ട്രെയിനിങ് ഇൻസ്റ്റിറ്റ്യൂട്ട് ഓഫ് ആൻഡ് റിസർച്ച് എടപ്പാൾ

You will not be punished for your anger, you will be punished by your anger: Buddha

അയ്യോ... വേണ്ട മോനെ.....വേണ്ടടാ

സന്ധ്യയ്ക്ക് തിരക്കേറിയ എംസി റോഡിൽ അലമുറയിട്ടു കരയുന്ന വൃദ്ധ...

സമീപത്തായി മോട്ടർസൈക്കിൾ മറിഞ്ഞു കിടക്കുന്നുണ്ട്. 50 മീറ്റർ അകലെ അവരുടെ മകൻ മറ്റൊരു ഇരുചക്ര യാത്രക്കാരനെ ഹെൽമറ്റ് കൊണ്ട് അടിക്കുന്നു.

അപകടത്തിൽ മറിഞ്ഞുവീണു പരുക്കു പറ്റിയ അമ്മയെ എഴുന്നേൽപ്പിക്കുന്നതിനു മുൻപ് അപരിചിതനെ പാഠം പഠിപ്പിക്കാൻ ശ്രമിക്കുന്ന കാഴ്ച.

പരിചയമോ വ്യക്തിവൈരാഗ്യമോ ഇല്ലാത്ത അപരിചിതരായ രണ്ടു വ്യക്തികൾ ഒരു നിമിഷാർധത്തിൽ ശത്രുക്കളായി മാറുകയാണ് നമ്മുടെ നിരത്തുകളിൽ. റോഡ് റേജ്, അഥവാ റോഡിലെ ദേഷ്യം എന്നത് വളരെ ഗൗരവമേറിയ സാമൂഹിക പ്രശ്നമാണ്. പലപ്പോഴും ഇതു വാക്കുതർക്കത്തിലും അകലത്തിലും കലാശിക്കുന്നു. ഒന്നു തോറ്റുകൊടുക്കാൻ മനസ്സില്ലാത്ത വിധം സാമൂഹിക മാനസികാവസ്ഥ മാറുന്നുണ്ടോ? മനഃശാസ്ത്ര പഠനത്തിൽ കോപ്പി ക്യാറ്റ് എഫക്ട് എന്നൊരു പ്രയോഗമുണ്ട്. ഒരു വിഷയത്തെ കുറിച്ച് ആവർത്തിച്ച് റിപ്പോർട്ട് ചെയ്യുമ്പോൾ അതിന്റെ അന്ധതയും അളവും വർധിക്കുന്നു എന്നതാണത്.

ആത്മഹത്യയും ക്യാംപസ് അക്രമങ്ങളുംപോലെ ഈ ഗണത്തിൽ വരുന്നതാണ് റോഡ് റേജും. അതുകൊണ്ടു തന്നെ ഇത്തരം കാര്യങ്ങൾക്കു കൂടുതൽ പ്രാധാന്യം കൊടുക്കുന്നതിനു പകരം നല്ല കാര്യങ്ങളെ ചൂണ്ടിക്കാണിക്കുകയും പ്രോത്സാഹിപ്പിക്കുകയും ചെയ്യുന്ന രീതികളാണ് സ്കൂൾ പഠനാന്തരീക്ഷത്തിലും മാധ്യമങ്ങൾ അടക്കമുള്ളവരും പാലിക്കേണ്ടത്.

റോഡ് റേജ് എന്നാൽ എന്ത്?

റോഡ് റേജ് എന്നത് ഡ്രൈവിങ് സമയത്തു കാണുന്ന അക്രമപരമായതോ, ക്രോധത്തോടെയോ ഉള്ള പെരുമാറ്റങ്ങളാണ്. അപമാനകരമായ ആംഗ്യങ്ങൾ, വാക്കു തർക്കം, ഭീഷണി, മറ്റുള്ളവർക്ക് അപകടം ഉണ്ടാക്കുന്ന ഡ്രൈവിങ്, കാൽനടയാത്രക്കാർ അടക്കമുള്ളവരോടുള്ള അസഹിഷ്ണുത എന്നിവയെല്ലാം ഇതിൽപെടുന്നു.