എടത്തനാലെ ഏദൻതോട്ടം

ഇന്ത്യയിലെ പത്തു സംസ്ഥാനങ്ങളുടെ 26 തനത് നാടൻ പശു ഇനങ്ങളുള്ള രശ്മിയുടെ ഫാമിലേക്കാണ് 2024 ലെ മില്യനയർ ഫാർമർ ഓഫ് ഇന്ത്യ പുരസ്കാരമെത്തിയത്

- രൂപാ ദയാബ്ജി

പശു ഒരു വളർത്തു മൃഗമാണ്. പശു നമുക്കു പാൽ തരും. പശുവിന്റെ പാൽ പോഷകങ്ങൾ നിറഞ്ഞതാണ്.' തൊടുപുഴ പന്നിമറ്റം എൽപി സ്കൂളിലെ തടി ബെഞ്ചിലിരുന്ന് ഉറക്കെയുറക്കെ ഈ വാചകങ്ങൾ പറഞ്ഞു പഠിക്കുമ്പോൾ രശ്മി മാത്യു എന്ന പാവാടക്കാരി ഓർത്തതേയില്ല പശു തന്റെ ജീവിതത്തിൽ ഒരു നിർണായക ജീവിയാകുമെന്ന്. ഇന്ന് ഇന്ത്യയിലെ 10 സംസ്ഥാനങ്ങളിൽ നിന്നുള്ള 26 ഇനം നാടൻ പശുക്കളുണ്ട് കോട്ടയം കുറുവിലങ്ങാട്ടെ രശ്മിയുടെ എടത്തനാൽ ഫാമിൽ.

ശുദ്ധമായ നല്ല ഭക്ഷണം മക്കൾക്കു കൊടുക്കണമെന്ന ആഗ്രഹത്തിൽ ആദ്യ പശുവിനെ സ്വന്തമാക്കിയ രശ്മിയുടെ ഫാമിലേക്ക് അവസാനമെത്തിയതു കർണാടകയിൽ നിന്നുള്ള ഹള്ളിഗർ ഇനമാണ്. പശുക്കൾ ഐശ്വര്യത്തിന്റെ സൈറൺ മുഴക്കിയപ്പോൾ ഇന്ത്യയിലെ മികച്ച ക്ഷീരകർഷകയ്ക്കുള്ള ഗോപാൽരത്ന പുരസ്കാരവും മികച്ച സമ്മിശ്ര കർഷകയ്ക്കുള്ള മില്യണയർ ഫാർമർ ഓഫ് ഇന്ത്യ പുരസ്കാരവുമടക്കം നിരവധി ദേശീയ നേട്ടങ്ങൾ രശ്മി സ്വന്തമാക്കി.

പതിമൂന്നാം വയസ്സിൽ ഒറ്റയ്ക്കു പശുവിന്റെ പ്രസവമെടുത്തപ്പോൾ ആ കുഞ്ഞിനോടു തോന്നിയ ഇഷ്ടമാണ് നാടൻ പശു പ്രേമത്തിന്റെ തുടക്കമെന്ന് രശ്മി പറയുന്നു. “അച്ഛൻ സണ്ണി തൊടുപുഴക്കാരനാണെങ്കിലും പാലക്കാടു കാഞ്ഞിരപ്പുഴയിൽ സ്വന്തമായി 15 ഏക്കറോളം കൃഷിയുണ്ടായിരുന്നു. അതു നോക്കിനടത്താനായി ഞങ്ങൾ അവിടേക്കു പോകുമ്പോൾ എന്റെ നാലാം ക്ലാസ്സിലെ പരീക്ഷാഫലം വന്നിരുന്നില്ല. അമ്മ കുട്ടിയമ്മയ്ക്കു കൃഷി വലിയ ഹരമായിരുന്നു. രണ്ട് അനിയന്മാർക്കും കൃഷിയോടു താൽപര്യമുണ്ടെങ്കിലും ഞാനായിരുന്നു കൃഷിയിലെ സഹായി.

ആദ്യത്തെ കൺമണി

പച്ചക്കറിയും കാപ്പിയും മാത്രമല്ല, പശുവും ആടും കോഴിയും പട്ടിയുമൊക്കെ കൃഷിയുണ്ട്. അങ്ങനെ ഒരു ദിവസം. പശുവിന്റെ കരച്ചിലും ബഹളവും കേട്ടു ചെന്നു നോക്കുമ്പോൾ കുഞ്ഞിന്റെ തല പുറത്തേക്കു വരുന്നു. വീട്ടിൽ ഞാൻ മാത്രമേയുള്ളൂ. ധൈര്യത്തോടെ പ്രസവമെടുത്തു. അമ്മയ്ക്കും കുഞ്ഞിനും വേണ്ടതെല്ലാം ചെയ്തു കൊടുത്തു. 13-ാം വയസ്സിൽ എന്റെ കയ്യിലേക്കു ജനിച്ചുവീണ ആ കിടാവാണ് എല്ലാത്തിന്റെയും തുടക്കം.