Super Moms Daa..

അമ്മമാരുടെ വാട് സാപ്പ് കൂട്ടായ്മ, സാമൂഹിക ഉത്തരവാദിത്തങ്ങൾ നിറവേറ്റുന്ന സംഘടനയായി മാറിയ കഥ

- രാഖി റാസ്

നാടു നാട്ടുകാർ മാറി. പെണ്ണുങ്ങൾ മാറി. അമ്മമാർ മാറിയോ? ഉറപ്പായും മാറി. അമ്മത്തം കളഞ്ഞുകൊണ്ടല്ല, അമ്മയുടെ നന്മകൾ വീട്ടിനുള്ളിലൊതുക്കാതെ പുറത്തുള്ളവരിലേക്കു കൂടി പ്രസരിക്കുന്ന വിധം വളർന്നുകൊണ്ട്...

"മോംസ് ഓഫ് കൊച്ചി' അഥവാ എംകെ സ്ഥാപകയും മാനേജിങ് ട്രസ്റ്റിയുമായ രാഖി ജയശങ്കറിന്റെ വാക്കുകൾ എംകെ എന്ന സംഘടനെയെ ഒറ്റവാചകത്തിൽ ഇങ്ങനെ കുറിക്കുന്നു.

“എംകെയിലെ അമ്മമാരിൽ ജോലിയുള്ളവരും സംരംഭകരും വീട്ടമ്മമാരുമുണ്ട്. ഇന്നത്തെ വീട്ടമ്മമാരിൽ പലരും നല്ല നിലയിൽ പഠിച്ചവരും ഉയർന്ന ശമ്പളവും സ്ഥാനവുമുള്ള ജോലിയിൽ ഇരുന്നവരുമൊക്കെയാണ്. കുടുംബത്തിനായി കുഞ്ഞുങ്ങൾക്കായി തങ്ങളുടെ കഴിവുകളും സാമൂഹിക പദവിയും വേണ്ടെന്നു വച്ച് അവർ അകത്തളങ്ങളിലേക്ക് ഒതുങ്ങുകയായിരുന്നു.

പക്ഷേ, വീട്ടമ്മമാരെക്കുറിച്ച് ആളുകളുടെ മനോഭാവം കുഞ്ഞുങ്ങളുടെ നാക്കി മാറ്റാൻ മാത്രമറിയുന്ന, പ്രഭാത ഭക്ഷണവും ഊണും തയാറാക്കാൻ ഉത്തരവാദിത്തപ്പെട്ട, പേരന്റ് ടീച്ചർ മീറ്റിങ്ങുകളിലേക്കു മാത്രം യാത്ര ചെയ്യാനറിയുന്ന വ്യക്തികളായാണ്. വീട്ടിലുള്ളവർ പോലും പലപ്പോഴും ഇവരുടെ കഴിവുകളെക്കുറിച്ചു മറന്നു പോകുകയാണ്. ഇതിനൊരു മാറ്റം കൊണ്ടുവരികയാണ് എംകെ എന്ന സംഘടനയുടെ പ്രധാന ലക്ഷ്യം. ''രാഖിയുടെ മുഖത്ത് ആത്മവിശ്വാസത്തിന്റെ പുഞ്ചിരി.

“വീട്ടമ്മമാരുടെ കഴിവുകൾ വളർത്തിയെടുക്കുകയെന്നാൽ അവ പ്രകടിപ്പിക്കാനൊരു വേദിയൊരുക്കുക മാത്രമല്ല ഉദ്ദേശിക്കുന്നത്. തങ്ങളുടെ കഴിവുകളിലൂടെ പണമുണ്ടാക്കുക, കുടുംബകാര്യങ്ങൾ നോക്കുന്നതിനൊപ്പം സ്വയം പര്യാപ്തരായിരിക്കുക, തങ്ങളാലാകും വിധം സേവനം ചെയ്തുകൊണ്ട് സമൂഹികമായി ഇടപെടുക, സ്വന്തം വ്യക്തിത്വത്തിനു വിലയും പരിഗണനയും നേടിയെടുക്കുക തുടങ്ങിയ കാര്യങ്ങളിലേക്ക് അമ്മമാരായ സ്ത്രീകൾ വരണം എന്നതാണു ലക്ഷ്യം.

ഇറങ്ങി പ്രവർത്തിച്ചു തുടങ്ങുമ്പോഴാണു കഴിവുകൾ പ്രതിഫലിച്ചു തുടങ്ങുക എന്നത് മോംപോ' എന്ന ഞങ്ങളുടെ പരിപാടി കഴിഞ്ഞപ്പോഴാണു മനസ്സിലായത്. എത്ര നല്ല സംഘാടകരാണു പലരും. ചിലർ മികച്ച രീതിയിൽ ആശയവിനിമയം ചെയ്യുന്നു, ചിലരാകട്ടെ സാമ്പത്തിക ഇടപാടുകൾ കൃത്യമായും ഭംഗിയായും കൈകാര്യം ചെയ്യുന്നു, പ്രശ്നപരിഹാരങ്ങളിലാണു മറ്റു ചിലരുടെ കഴിവ്.