ഒപ്പം വളർന്ന് ഒരുമിച്ചു പറന്ന്

വിജയത്തിന്റെ നെറുകയിൽ നിൽക്കുന്ന സ്ത്രീകളേക്കാൾ മനോഹരമായ കാഴ്ചയെന്തുണ്ട്? കാൻ ഫെസ്റ്റിവലിലെ മലയാളത്തിന്റെ അഭിമാനം കനി കുസൃതിയും ദിവ്യപ്രഭയും

- സീനാ ടോണി ജോസ്

ദിവ്യപ്രഭ ഒരിക്കൽ കനിയോടു പറഞ്ഞു, “മുംബൈയ്ക്കടുത്തു രത്നഗിരി എന്നൊരു സ്ഥലമുണ്ട്. ചുവപ്പു കുന്നുകളും അതിനു താഴെ നീലക്കടലുമുണ്ട്. നമ്മുടെ വർക്കല ക്ലിഫ് പോലെ എന്നാൽ അതിന്റെ ഇരട്ടി സൗന്ദര്യമുള്ള സ്ഥലം. ദൂരെ കുന്നുകളിൽ നിന്ന് മഴ ഓടിവന്ന് കടലിലേക്കു പെയ്യുന്നതു ആദ്യമായി ഞാൻ കണ്ടത് അവിടെയാണ്. കനി ഒരിക്കലെങ്കിലും അവിടെ പോണം. തീർച്ചയായും ഇഷ്ടപ്പെടും പായൽ കപാഡിയയുടെ ഓൾ വി ഇമാജിൻ ആസ് ലൈറ്റ് ' എന്ന ചിത്രത്തിലേക്കു രണ്ടുപേരും തിരഞ്ഞെടുക്കപ്പെട്ടപ്പോൾ കനി ദിവ്യയെ വിളിച്ചു.

"സിനിമയുടെ സെക്കൻഡ് ഷെഡ്യൂൾ എവിടെയാണെന്നോ? ദിവ്യ പറഞ്ഞ രത്നഗിരിയിൽ. ആ സിനിമയെ കാനിൽ ലോകം ആദരിക്കുമ്പോൾ മലയാളികളായ രണ്ടു പെൺകുട്ടികളുടെ സുദൃഢമായ "സിസ്റ്റർ ഹുഡി'ന്റെ കഥകൂടി പിന്നിലുണ്ട്. അവർ കൈ കോർത്തു പറയുന്നു, “ഒപ്പം വളർന്നവരാണു ഞങ്ങൾ

അഭിമാനത്തോടെ കാനിലേക്കു പോകുമ്പോൾ എന്തായിരുന്നു രണ്ടുപേരുടെയും മനസ്സിൽ

ദിവ്യ: ടെൻഷനും എക്സൈറ്റ്മെന്റും ചേർന്ന ഒരു തരം ടെൻസൈറ്റ്മെന്റ്. ഡബ്ബിങ്ങിനിടയിൽ പല ഭാഗങ്ങൾ ആയികണ്ട സിനിമ ആദ്യമായി പൂർണമായി കാണാൻ പോകുന്നു എന്നു മാത്രമേ അപ്പോൾ ആലോചിച്ചുള്ളൂ.

കനി അഭിനേതാക്കൾ എല്ലാവരും തന്നെ ആ ചിത്രം കാണുന്നത് കാനിലെ പ്രീമിയർ ഷോയിലാണ്. ഞാൻ വളരെ കൂൾ ആയിരുന്നു. പക്ഷേ, ആദ്യമായി സിനിമ കാണുന്നു എന്നോർക്കുമ്പോൾ ഉള്ള ഒരു ഹൈ' ഉണ്ടായിരുന്നു.

“ഹാ.. നമ്മള് പറക്കുകയാണ്' എന്നൊരു തോന്നൽ. ഒരു ചെറുശബ്ദം പോലും ഇല്ലാതെ ശാന്തമായി ഇരുന്നു സിനിമ കാണുകയാണ് അവിടുത്തെ മുഴുവൻ ഓഡിയൻസും. തീർത്തും സമാധാനപരമായി ഇരുന്നു സിനിമ കാണാൻ അതെന്നെ സഹായിച്ചു.

ദിവ്യ: സിനിമ കാണുന്നതിനിടയ്ക്ക് എന്റെ ശ്രദ്ധ ഇടയ്ക്ക് ചുറ്റുമുള്ളവരിലേക്കു കൂടി പോകുന്നുണ്ടായിരുന്നു. ഇവർ എങ്ങനെയാണു സിനിമയെ സ്വീകരിക്കുന്നത് എന്ന് അറിയാനുള്ള ആകാംക്ഷ ഉണ്ടായിരുന്നു. സിനിമ കഴിഞ്ഞതും നീണ്ട കയ്യടികൾ തുടങ്ങി. മൂന്നു മിനിറ്റായി, നാലു മിനിറ്റായി അതു നിലയ്ക്കുന്നേയില്ല. ഇതെന്താ ഇവർ ഇങ്ങനെ കയ്യടിക്കുന്നത് എന്നൊക്കെയാണ് ഞാൻ ചിന്തിക്കുന്നത്.