தீபாவளித் திருநாளும் சஷ்டித் திருவிழாவும்!

சோதி என்னும் கரையற்ற வெள்ளம் தோன்றி எங்கும் திரை கொண்டு பாய என்று மகாகவியுடன் இயற்கையின் ஒளி வெள்ளத்தைக் கண்டு மகிழ்கிறோம்; தீபமங்கள ஜோதி நமோநம என்று ஒளியில் இறைவனை உணர்ந்து பக்தியுடன் வழிபடுகிறோம். ஒளி பல நிலைகளில் நம் வாழ்க்கையோடு இணைந்துள்ளது. ஒளியே உலகின் இயக்கம். இருள் எனும் அறியாமையிலிருந்து நம்மை மீட்பது ஒளி எனும் ஞானம். ஆகையால் தான் ஆண்டவனும் தீபஒளியாக வணங்கப்படுகிறான்!

- மாலதி சுந்தரராஜன்

தீப வழிபாட்டுத் திருநாள் இரண்டு. ஒன்று, தீபாவளித் திருநாள், ஐப்பசி மாதம் கொண்டாடப்படுவது, மற்றொன்று திருக்கார்த்திகை திருநாள், கார்த்திகை மாதம் கொண்டாடப்படுவது. இரண்டுமே அக இருளையும் புற இருளையும் நீக்கி நல்வழி காட்டும் பண்டிகைகள். இதில் தீபாவளிப் பண்டிகை இமயம் முதல் குமரி வரை மிகச் சிறப்பாகக் கொண்டாடப்பட்டு வருகிறது.

ஒளியை ஆராதிக்கும் பாரத நாட்டின் பாரம்பரியப் பண்டிகையாக ஒளிர்கிறது தீபாவளி! தீப, ஆவளி என்ற இரு சொற்களின் சேர்க்கையே தீபாவளி. இதற்கு விளக்குகளின் வரிசை என்று பொருள். பொய்மை, அறியாமை போன்ற எதிர்மறை எண்ணங்களிலிருந்து, உண்மை, அறிவு அமைதி போன்ற நேர்மறை எண்ணங்களை வரவேற்கும் திருநாள் தீபாவளித் திருநாள்! தீபாவளிப் பண்டிகையின் உட்கருத்து இதுவே! இது போன்ற உட்பொருளை நினைவில் வைத்திருந்து பின்பற்றுவதற்காக ஏற்படுத்தப்பட்டவையே பண்டிகைகள்.

தீபாவளிப் பண்டிகை பல புராண பின்னணிகளைக் கொண்டது. கந்தபுராணத் தின்படி, இறைவன் அர்த்தநாரீஸ்வரராக வடிவெடுத்த தினம் தீபாவளி என்று குறிப்பிடப்படுகிறது. ஈசனை நோக்கி அன்னை பராசக்தி தவமிருந்து அதன் நிறைவில் ஐயன் திருவுருவில் சரிபாதியாக அமர்ந்த தினமாகக் கருதப்படுகிறது. இதனையொட்டித்தான் தீபாவளியின் போது கேதார கௌரி விரதம் பலரால் அனுஷ்டிக்கப்படுகிறது. ஆணும் பெண்ணும் சமம் என்ற தத்துவத்தை இது போதிக்கின்றது.

புகழ்பெற்ற இதிகாசம் ராமாயணத்தின் படி, பதினான்கு ஆண்டு வனவாசமும் ராவண சம்காரமும் வெற்றிகரமாக முடித்து ஸ்ரீராம பிரான் அயோத்திக்கு திரும்பிய நன்னாளை மக்கள் உற்சாகமாக கொண்டாடிய தினமே தீபாவளித் திருநாள் என்று கூறப்படுகிறது! அன்று அயோத்தி நகரமே விளக்கேற்றி ஸ்ரீராமனை வரவேற்றது! இராமனைக் கண்ணால் காண்போம், இன்றே பிறந்த பயன் அடைவோம். அவன் நாமாமிர்தம், செவிக்கு திவ்யாமிர்தம், ஸ்ரீராமநாமம் செவிக்கு தேவாமிர்தம் அல்லவா?! ஆகையால் இன்றும் அயோத்தியில் தீபாவளி முக்கிய திருநாளாக, வண்ண விளக்கு அலங்காரத்துடன் கொண்டாடப்படுகிறது! உத்தமரை உலகம் கொண்டாடும் என்ற கருத்து இதில் அடங்கியுள்ளது!