விநாயகருக்கு பிடித்த கொழுக்கட்டைகள்!

ஆங்கில மாதமான ஆகஸ்ட் மாதம் பிறந்துவிட்டாலே ஆடி ஆவணி மாதங்களில் அனைத்து பண்டிகைளும் ஒன்றன் பின் ஒன்றாக வந்து நம்மை இன்பத்தில் ஆழ்த்தும்.

- உஷா முத்துராமன், மதுரை

எந்த ஒரு வேலை தொடங்கினாலும் அது குறைபாடு இல்லாமல் முழுமையாக நிறைவு பெற வேண்டும் என்றால் நாம் பிள்ளையார் சுழி போட்டு தொடங்குவோம். அதேபோல் அந்த விக்னமில்லா விநாயகனை போற்றும் நாளான பிள்ளையார் சதுர்த்தி வரும் நாளில் அவருக்கு பிடித்த உணவான கொழுக்கட்டைகள் பல வகை செய்து படைக்கும் போது அவருடைய அருள் நமக்கு கிடைப்பது உறுதி.

தேங்காய் பூரண கொழுக்கட்டை

தேவையான பொருட்கள்: துருவிய தேங்காய் - இரண்டு கப், வெல்லம் - ஒரு கப், ஏலப்பொடி - சிறிதளவு, அரிசி மாவு - 2 கப், உப்பு - சிறிதளவு, நல்லெண்ணெய் -இரண்டு ஸ்பூன்

செய்முறை: தேங்காய் துருவலுடன் வெல்லம் கலந்து. கைவிடாமல் கிளறி இரண்டும் ஒன்று சேர்ந்து அதில் ஏலப்பொடியையும் சேர்த்து சிறிது தண்ணீர்விட்டு லேசாக சூடாக்கி கீழே இறக்கி வைத்து விட்டால் பூரணம் தயார்.

அரிசி மாவு ஒரு கப் என்றால் இரண்டு கப் என்று வெந்நீரைக் கொதிக்க விட்டு அதில் போட்டு சிறிது உப்பும், நல்லெண்ணெய்யும் ஊற்றி அரிசி மாவை கைவிடாமல் கிளறவும். பிறகு இறக்கி வைத்து அந்த மாவினை சொப்பு போல செய்து அதில் தேங்காய் பூரணத்தை வைத்து மூடி இட்லி தட்டில் 10 நிமிடம் வேக வைத்து விட்டால் தேங்காய் பூரண கொழுக்கட்டை தயார்.

கேஹுபனீர் கொழுக்கட்டை

தேவையான பொருட்கள்: கோதுமை மாவு - ஒரு கப்ப, துருவிய பனீர் - 1 கப், துருவிய தேங்காய் - ஒரு கப், வெல்லம் - ஒரு கப், ஏலக்காய் - சிறிதளவு, நெய் - தேவையான அளவு.

செய்முறை: ஒரு இரும்பு சட்டியில் ஒரு ஸ்பூன் நெய்யை ஊற்றி பன்னீரையும் தேங்காயையும் போட்டு நன்றாக வதக்கி அதன் மீத பொடி செய்த வெல்லத்தை போட்டு எல்லாம் ஒன்றாக சேர்ந்து வரும் போது ஒரு ஸ்பூன் நெய் ஊற்றி கீழே இறக்கி வைத்து ஏலப் பொடியை போட்டு பூரணம் தயார் செய்து கொள்ளவும். கோதுமை மாவை சிறிதளவு நெய் உப்பு போட்டு சப்பாத்தி மாவு போல் பிசைந்து சப்பாத்தி போல் சிறிதாக வட்டமாக இட்டு அதில் தயாரித்து வைத்துள்ள பனீர் பூரணத்தை வைத்து மூடி இட்லி தட்டில் பத்து நிமிடம் வேக வைத்து விட்டால் சுவையான கேஹூ பனீர் கொழுக்கட்டை தயார்.