போராடும் தனி மனிதர்கள்!

எங்கள் பகுதியிலிருந்து சுமார் ஐந்து கிலோ மீட்டர் தூரத்தில் ஆனையூர் என்ற கிராமம் இருக்கிறது. அங்குள்ள சிறிய குன்றில் அமைந்துள்ள குடவறைக் கோயிலும், அழகான சுனையும், அந்த குன்றின் மேல் கொஞ்சும் இயற்கைக் காட்சிகளுமாக அருமையான ஒரு இடம் அது.

- அகிலாண்ட பாரதி

குடைவறைக் கோயிலுக்கு வெளியில் அமைக்கப் பட்டிருக்கும் ஒரு மண்டபத்தில் யோக தட்சிணாமூர்த்தியின் சிலை இருக்கிறது.

அந்த மண்டபத்திலும் குன்றின் மேல் இருக்கும் மற்றொரு மண்டபத்திலும் பாண்டியர் காலச் சின்னங்களான மீனும் கொடியும் காணப்படுகின்றன. மிக அழகான இடம், அவசியம் சென்று வாருங்கள் என்று பலர் கூறியதையடுத்து பல ஆண்டுகளுக்கு முன்பாக முதன் முதலாக அந்தக் கோவிலுக்குச் சென்றோம்.

கோவிலைப் பராமரித்து வருபவர் ஒரு முதியவர். எப்படியும் 80 வயதுக்குக் குறையாமல் இருக்கும். மெலிந்த தேகமும், உறுதியான உடற்கட்டுமாக இருந்த அந்தப் பெரியவர் தான் அந்த கோவிலின் பூசாரியும் கூட.

அங்கு சுற்றிலும் சாதாரணமாக மயில்கள் நடமாடும்,மேலே கழுகுகள் பறக்கும், கிராமத்தில் இருந்து வரும் ஆடு மாடுகள் சாவகாசமாக மலையில் ஏறி அங்குமிங்கும் வளர்ந்திருக்கும் பயிர் பச்சைகளை மேய்வதையும் பார்க்கலாம்.

ஐந்து நிமிடங்களில் ஏறி விடக்கூடிய அந்த குன்றின் மேல் இருக்கும் அமைப்பைப் பார்த்தால் சில இடங்களில் ஆங்காங்கே பள்ளம் அமைத்தாற் போல் இருக்கும். 'சமணர் படுகை போல் இருக்கிறது, வேறு சில இடங்களில் சமணர் குடியிருப்புகள் இப்படித்தான் இருக்கும்' என்று கூறினார் ஒருமுறை எங்களுடன் அங்கு வந்த எங்கள் உறவினர்.