SA en Tuinroete-toutrek verloor 'n legende

Barries Barnard (65), die president van beide Eden-toutrek en die SA junior toutrekfederasie, asook adjunkpresident van die SA toutrekfederasie, is op 4 November oorlede. Huldeblyke stroom sedertdien van regoor die land in vir dié merkwaardige en passievolle man.

- Linzetta Calitz

Barries se vrou, Anita, sê hy was 'n groot legende. "As jy net op sy Facebook of op my Facebook gaan kyk hoeveel mense, en kinders, testimonials van hom skryf, dan besef 'n mens weer hy was 'n ongelooflike man."

Sy sê jy kom dan agter hoeveel mense se lewens hy eintlik, nie net as onderwyser nie, maar as sportmens in toutrek en as destydse rugbyafrigter aangeraak het.

Sy dood volg ná sowat twee maande se gesondheidskwessies. Anita sê hy was in hierdie tyd gedurig in die hospitaal. Hy het eers 'n hartomleiding ondergaan en daarna, volgens haar, 'n longvirus opgedoen waarvoor hy in die intensiewesorgeenheid opgeneem is. Hy was daarna weer huis toe, maar is later weer opgeneem weens lae suurstofvlakke. Sy sê sy longe het ernstige skade opgedoen en hy moes later op 'n ventilator geplaas word. Weens sy lae suurstofvlakke is sy niere ook aangetas, wat dialise genoodsaak het.

"Hulle het my Dinsdagoggend so net voor 05:00 gebel om te sê hy doen nie goed nie. Ongelukkig het die dialise nie die nodige wonderwerk vir ons verrig nie. Hy is om 09:15 oorlede.