Katte afgemaai deur gifdoder in Bos en Dal

Diereliefhebbers in Braambosstraat, Bos en Dal, is in skok nadat 'n klomp katte glo in die laaste paar maande deur 'n buurman vergiftig is.

- Kristy Kolberg

Hulle waarsku dat die gif wat gebruik word, nie net troeteldiere bedreig nie, maar ook 'n gevaar vir kinders kan inhou. Veeartse het intussen bevestig dat die diere aan gif blootgestel is.

Een van die slagoffers was Popcorn, 'n kat wat al 12 jaar deel van sy eienaar, Coleika Wagener, se lewe was.

“Hy was soos 'n mens. Baie netjies en vol fiemies. Hy het glad nie daarvan gehou om vuil te wees nie. Hy het nooit na die bure toe gegaan nie, want almal het honde. Hy was altyd by die huis en het nie sommer enigiets geëet nie,” vertel sy.

Toe bure onlangs begin vertel dat hul katte vergiftig is, het Wagener Popcorn binnenshuis probeer hou. Maar op 'n Sondag 17 Augustus is die geliefde troeteldier dood in 'n buurman se erf aangetref ná daar reeds 'n poging aangewend was om hom 'n week vroeër te vergiftig.