ജീവിതം സുരക്ഷിതമാക്കണോ? ഫോണിനെ സൂക്ഷിക്കൂ!

പണത്തിന്റെ കൊടുക്കൽ വാങ്ങലുകൾക്കുള്ള ഉപകരണമാണു നമ്മുടെ മൊബൈൽ ഫോണുകൾ. ശമ്പളമോ പെൻഷനോ ബിസിനസ്, പ്രഫഷനൽ വരുമാനമോ വരവായാലും ചെലവായാലും ബാങ്ക് അക്കൗണ്ടിലൂടെയാണെങ്കിലും സ്മാർട് ഫോൺ വഴിയാണ് ഇടപാടുകളെല്ലാം. ഈ സാഹചര്യത്തിൽ ഫോണിന്റെ സുരക്ഷ നമ്മുടെ പണപ്പെട്ടിയുടെ താക്കോൽ കൂടിയാണ്. അതുറപ്പു വരുത്താനും അബദ്ധങ്ങൾ വഴി പണനഷ്ടം ഇല്ലാതാക്കാനും അറിയേണ്ട കാര്യങ്ങൾ.

- രാജ്യശ്രീ എസ്.

അത്യാവശ്യം വന്നാൽ വായ്പയെടുക്കാൻ, ബില്ലുകൾ സമയത്ത് അടയ്ക്കാൻ വിവിധ പദ്ധതികളിൽ പണം നിക്ഷേപിക്കാൻ ആദായനികുതി റിട്ടേൺ ഫയൽ ചെയ്യാൻ എന്നുവേണ്ട നിങ്ങളുടെ മണി മാറ്റേഴ്സ് എന്തുമാകട്ടെ, അതെല്ലാം നിറവേറ്റാൻ ഇന്ന് ഒരു മൊബൈൽ ഫോണോ ലാപ്ടോപ്പോ മതി. വേഗത്തിൽ മാത്രമല്ല തികച്ചും ലളിതമായി, എവിടെയിരുന്നും അതെല്ലാം ചെയ്യാനും കഴിയും. സാങ്കേതികവിദ്യാരംഗത്തെ വൻ വിപ്ലവമാണിതെല്ലാം സാധ്യമാക്കിയത്.

പക്ഷേ, മറുവശത്ത് അതേ സാങ്കേതികവിദ്യ തന്നെ ആയുധമാക്കി അതിവിദഗ്ധമായി വിവിധതരം തട്ടിപ്പുകൾ നടത്തുന്നതും വർധിക്കുകയാണ്. നമ്മുടെ ഫോണിലെ വിവരങ്ങൾ ചോർത്തി, അതുപയോഗിച്ചു ലോകത്തിന്റെ ഏതോ കോണിൽ ഇരുന്ന് അവർ ലക്ഷങ്ങളും കോടികളും തട്ടുന്നു. അധികൃതർ സുരക്ഷാസംവിധാനങ്ങൾ ശക്തമാക്കുന്തോറും അതിനെയെല്ലാം മറികടന്നു പുതിയതും കുറ്റമറ്റതുമായ തട്ടിപ്പുകൾ രൂപംകൊള്ളുന്നു. തട്ടിപ്പിന് ഇന്നല്ലെങ്കിൽ നാളെ നിങ്ങളും ഇരയാകാം.

ഇവിടെ മറക്കരുതാത്ത ഒരു യാഥാർഥ്യം കൂടിയുണ്ട്. ഇന്നു ഫോണെന്നാൽ ഓരോ വ്യക്തിയെ സംബന്ധിച്ചും ജീവനും ജീവിതവുമാണ്. സ്വകാര്യജീവിതവും വിനോദോപാധികളും ഫോട്ടോകളും വിഡിയോകളും അടക്കം ഒരു വ്യക്തിയുടെ ജീവിതമാകെ ആവാഹിച്ചു സൂക്ഷിച്ചിരിക്കുന്ന ഒരു ഇലക്ട്രോണിക് ഉപകരണം.

അതുകൊണ്ടു പണത്തിലുപരി ഓരോരുത്തരുടെയും ജീവിതത്തിന്റെ മൊത്തം സുരക്ഷയും ഫോണുമായി ബന്ധപ്പെട്ടിരിക്കുന്നു. ഫോണുമായി ബന്ധപ്പെട്ട അപകടസാധ്യത വലിയ വെല്ലുവിളിയാകുന്നതും ഇവിടെയാണ്. ഇതൊന്നും ഒരിക്കലും ആരെക്കൊണ്ടും പൂർണമായും ഒഴിവാക്കാനാകില്ല. എന്നാൽ, ഇനി ഫോണിനെ പല കാര്യങ്ങളിൽ നിന്നും ഒഴിവാക്കാം എന്നാഗ്രഹിച്ചാൽ അതൊട്ടു നടക്കാനും പോകുന്നില്ല.

പക്ഷേ, അൽപം ശ്രദ്ധ പുലർത്തിയാൽ വലിയൊരളവോളം അപകടങ്ങൾ ഒഴിവാക്കാൻ സാധിക്കും. ഡിജിറ്റൽ ലോകത്തെക്കുറിച്ചു കൂടുതൽ അറിയുകയാണു വേണ്ടത്. തട്ടിപ്പുകളും അപകടങ്ങളും ഏതെല്ലാം തരത്തിൽ കടന്നുവരാമെന്നും മനസ്സിലാക്കണം. അവ മറികടക്കാനുള്ള മാർഗങ്ങൾ അറിയണം. ആവശ്യമായ മുൻകരുതലുകൾ എടുക്കണം.

ജീവിതം തന്നെ ഹാക് ചെയ്യാനായി സ്മാർട് ഫോൺ തുറന്നിടുന്നവർ