വിജയം കണ്ടത് വിപണന മികവിൽ

മാംഗോസ്റ്റീൻ കൃഷിചെയ്ത് നേട്ടത്തിലേക്ക്

- ജെ. ജേക്കബ്

കോഴിക്കോട് താമരശ്ശേരിയിലെ കൊയ്ത്തൊടി അഹമ്മദ് 10 വർഷം മുൻപാണ് മാംഗോസ്റ്റീനിൽ വിപുലമായ നിക്ഷേപം നടത്തിയത്. പരമ്പരാഗത വിളകൾക്കു പകരക്കാരനായി മാംഗോസ്റ്റീൻ തിരഞ്ഞെടുക്കാൻ പ്രചോദനമായതു തൊടിയിൽ ഉമ്മ നട്ട് 3 മാംഗോസ്റ്റീൻ മരങ്ങളായിരുന്നുവെന്ന് അഹമ്മദ്. തിരിച്ചറിയപ്പെടാതെ അവഗണിക്കപ്പെട്ടിരുന്ന ആ മരങ്ങൾക്ക് 1985ൽ കൃഷി ഏറ്റെടുത്തപ്പോൾ മുതൽ അഹമ്മദ് പ്രത്യേക പരിചരണം നൽകിയിരുന്നു. അതോടെ മികച്ച നിലവാരമുള്ള കായ്കൾ ധാരാളമായി ലഭിച്ചു തുടങ്ങി. തുടക്കത്തിൽ സുഹൃത്തുക്കൾക്കും ബന്ധുക്കൾക്കുമൊക്കെ സമ്മാനിക്കുക മാത്രം ചെയ്തിരുന്ന മാംഗോസ്റ്റീൻ പഴങ്ങൾ ക്രമേണ വിറ്റുതീർക്കേണ്ട സ്ഥിതിയായപ്പോഴാണ് ഇതിന്റെ വാണിജ്യകൃഷി സാധ്യത അഹമ്മദ് തിരിച്ചറിഞ്ഞത്. അതോടെ കൂടുതൽ അന്വേഷണവും പഠനവുമായി.

തെങ്ങും കമുകും നിന്നിരുന്ന പറമ്പിൽ പകരക്കാരനായി മാംഗോസ്റ്റീൻ എത്തിയത് 2013ൽ. റബറിനു വിലയിടിഞ്ഞപ്പോഴും അഹമ്മദ് കണ്ടെത്തിയ ബദൽ വിളകളിലൊന്ന് മാംഗോസ്റ്റീൻ ആയിരുന്നു. പുരയിടത്തിലെ 3 മരങ്ങളിൽ നിന്നു തയാറാക്കിയ തൈകൾക്കൊപ്പം നഴ്സറികളിൽ നിന്നു വാങ്ങിയതുൾപ്പെടെ 500 തൈകളാണു നട്ടത്. തുടക്കം മുതൽ ശാസ്ത്രീയമായ പരിചരണം നൽകി. കൃഷിരീതി മനസ്സിലാക്കാൻ ഒട്ടേറെ കൃഷിയിടങ്ങൾ നേരിട്ടു കാണുകയും പലരുടെയും ഉപദേശം തേടുകയും ചെയ്തു.

വരുമാനസാധ്യത

 ശരിയായ പരിചരണം നൽകിയതും ഉയരം കുറയ്ക്കാതുമായ മരത്തിൽനിന്ന് ഇരുപതാം വർഷം 3,500 കായ്കൾ വരെ പ്രതീക്ഷിക്കാം. അതായത്, ഏകദേശം 260 കിലോ. കച്ചവടക്കാരുമായി വില പേശാൻ കഴിയണം. കിലോയ്ക്ക് 180 രൂപ വരെ നേടാം. എന്നാൽ, ഒരു മരത്തിൽനിന്ന് 40 കിലോ വിളവും കിലോയ്ക്ക് 100 രൂപ വിലയും മാത്രം പ്രതീക്ഷിച്ചേ കൃഷി തുടങ്ങാവൂ. വരുമാനസാധ്യതയേറെയെങ്കിലും സമതലപ്രദേശങ്ങളിൽ പരിപാലനം വെല്ലുവിളിയാണെന്ന് അഹമ്മദ്, വരുമാനത്തിനായി കൂടുതൽ കാലം കാത്തിരിക്കണമെന്നതും പരിമിതിയാണ്.