ഗോവൻ വൈബ്

ബോബർ ഡിസൈനിൽ ക്ലാസിക്കിന്റെ പുതിയ മോഡൽ ഗോവൻ ക്ലാസിക് 350

- നോബിൾ എം. മാത്യു

ഗോവൻ ക്ലാസിക് ഇതുവരെയുള്ള റോയൽ എൻഫീൽഡ് ബൈക്ക് മോഡലുകളിൽ നിന്നും വേറിട്ടൊരു പേരും രൂപവും. അതാണ് ഗോവൻ ക്ലാസിക്കിനെ വ്യത്യസ്തമാക്കുന്നത്. നമ്മുടെ വിപണിയിൽ അധികം കാണാത്ത എന്നാൽ ബൈക്ക് പ്രേമികളുടെ ഹരങ്ങളിലൊന്നായ ബോബർ ശൈലിയിലാണ് ഗോവൻ ക്ലാസിക്കിനെ റോയൽ എൻഫീൽഡ് അണിയിച്ചൊരുക്കിയിരിക്കുന്നത്. ക്ലാസിക്കിൽ നിന്നും എന്താണ് മാറ്റം? ഗോവൻ മണ്ണിലൂടെ ഗോവൻ ക്ലാസിക്കിലൊന്നു റൗണ്ടടിച്ചു വരാം ....

രൂപകൽപന

പത്തൊൻപതാം നൂറ്റാണ്ടിന്റെ ആദ്യ പകുതിയിൽ തന്നെ ബോബർ യുഗം ആരംഭിച്ചെന്നു പറയാം. മോട്ടർ സൈക്കിളിന്റെ ഭാരം കുറയ്ക്കാനും വേഗം കൂട്ടാനുമായി ഹാൻഡിൽ ബാറിന്റെ ഉയരം കൂട്ടിയതും പില്യൺ സീറ്റ് ഊരിമാറ്റിയതും ഫെൻഡറും എക്സോസ്റ്റുമൊക്കെ കട്ട് ചെയ്തതുമെല്ലാം ബോബർ ശൈലിയായി മാറി. എന്തായാലും ബോബർ അക്കാലം മുതൽ ഇന്നു വരെ ഹിറ്റാണ്. ഹിപ്പിക്കാലമാണ് ബോബർ മോഡലുകളുടെ വസന്തകാലമായിരുന്നത്. ഇന്ത്യയിൽ ഗോവയായിരുന്നു അതിന്റെ തലസ്ഥാനവും. ആ കാലഘട്ടത്തിന്റെ സ്മരണാർഥമാണ് റോയൽ എൻഫീൽഡ് ഈ മോഡലിന് ഗോവൻ ക്ലാസിക് എന്ന പേരിട്ടിരിക്കുന്നത്.