റിയലി അമേസിങ്!

പരിഷ്കാരങ്ങളോടെ ഹോണ്ട അമേസിന്റെ മൂന്നാം തലമുറ

- നോബിൾ എം. മാത്യു

പതിനൊന്നു വർഷം. 5.8 ലക്ഷം യൂണിറ്റുകൾ. രണ്ടു തലമുറകളിലായി ഹോണ്ട അമേസ് വിപണിയിൽ കുറിച്ച കണക്കുകളാണിത്. വിപണിയിൽ ഹോണ്ടയ്ക്ക് വേരോട്ടം നൽകിയ മോഡലുകളിൽ എന്നും മുന്നിലുള്ള പേരാണ് അമേസ്, മുഖ്യ എതിരാളിയായ മാരുതി ഡിസയറിന്റെ പുതിയ പതിപ്പ് എത്തിയതിനു പിന്നാലെ ഹോണ്ട അമേസിനെയും മുഖം മിനുക്കി ഇറക്കിയിരിക്കുകയാണ്. ടീസർ ചിത്രം തന്നെ ചർച്ചാവിഷയമായിരുന്നു. അമേസിന്റെ മൂന്നാം തലമുറ മോഡലിൽ എന്തൊക്കെ പുതുമകളാണ് ഹോണ്ട ഒരുക്കിയിരിക്കുന്നതെന്നു നോക്കാം. ഗോവയിൽ നടന്ന മീഡിയാഡ്രൈവിൽ ഓടിച്ചറിഞ്ഞ കാര്യങ്ങളിലേക്ക് ...

ഡിസൈനിൽ മാറ്റമുണ്ടോ?

ഉണ്ടോ എന്നു ചോദിച്ചാൽ ഉണ്ട്. എന്നാൽ അടിമുടി ഉടച്ചു വാർത്തിട്ടില്ല എന്നതാണ് സത്യം.

അകത്തും പുറത്തും പരിഷ്കാരങ്ങൾ പ്രകടം. മുൻ മോഡലുമായി തട്ടിച്ചാൽ നീളം ഉയരം വീൽബേസ് എന്നിവയിൽ മാറ്റമില്ല. എന്നാൽ വീതി 38 എംഎം കൂടിയിട്ടുണ്ട്. മാത്രമല്ല ബൂട്ട് സ്പേസിൽ 4 ലീറ്ററിന്റെ വർധനയുണ്ട്.

ഹോണ്ടയുടെ പുതുതലമുറ മോഡലുകളുടെ ഡിസൈൻ തുടർച്ച പുതിയ അമേസിലും കാണാം. എലിവേറ്റിൽ കണ്ട തരത്തിലുള്ള വലിയ ഗ്രില്ലാണ് മുന്നിലെ എടുത്തറിയുന്ന പ്രധാന മാറ്റം. സ്പോർടി ആൻഡ് ബോൾഡ് ലുക്കാണ് ഇപ്പോൾ. മുൻ മോഡലിലുള്ളതിനെക്കാളും കനം കുറഞ്ഞ ക്രോം ഇൻസേർട്ട് ഗ്രില്ലിനു മുകളിലായി നൽകിയത് പ്രീമിയം ഫീൽ നൽകുന്നുണ്ട്. കൂടുതൽ പ്രകാശം ചൊരിയുന്ന എൽഇഡി ബൈ-പ്രൊജക്ടർ ഓട്ടമാറ്റിക് ഹെഡ്ലൈറ്റാണ്. ഓട്ടോ വൈപ്പറിനൊപ്പം ചേർന്ന് ഓട്ടോ ഹെഡ്ലാംപും പ്രകാശിക്കും. വശക്കാഴ്ചയിൽ കാര്യമായ മാറ്റമില്ല. പുതിയ ഡ്യുവൽ ടോൺ 15 ഇഞ്ച് അലോയ് വീലാണ്. ഹെഡ്ലൈറ്റിൽ നിന്നു തുടങ്ങി ടെയിൽ ലാംപിലെത്തിനിൽക്കുന്ന ബോൾ ക്യാരക്ടർ ലൈൻ വശത്തിന് എടുപ്പു നൽകുന്നുണ്ട്. വിങ് മിറർ എ പില്ലറിൽ നിന്നും ഡോറിലേക്കു മാറ്റി. എടുത്തു നിൽക്കുന്ന ടെയിൽലാംപുകളോടു കൂടിയ പിൻവശം മനോഹരമായിട്ടുണ്ട്. ഡിസൈനിൽ പുതിയ സിറ്റിയോടാണ് സാമ്യം.

പുതുമ ഉള്ളിലും?