ICONIQ

ഫ്യൂച്ചറിസ്റ്റിക് ഡിസൈനുമായി കിടിലൻ ഇലക്ട്രിക് എസ്യുവി അയണിക് 5

- പ്രവീൺ

വീലുകളുള്ള ഡയമണ്ട്. ഒറ്റവാചകത്തിൽ ഹ്യുണ്ടേയ് ഗ്ലോബൽ ഇലക്ട്രിക് എസ്യുവി അയണിക് 5 നെ ഇങ്ങനെ വിശേഷിപ്പിക്കാം. കൊതിപ്പിക്കുന്ന ചതുരവടിവ്. മുൻപു ഹ്യുണ്ടേയ് പിൻതുടർന്നിരുന്ന ഫ്ലൂയിഡിക് രൂപകൽപനയിൽനിന്ന് ഏറെ മാറിയിട്ടുണ്ട് അയണിക് 5. ഒപ്പം ഫ്യൂച്ചറിസ്റ്റിക്കുമാണ്. താരം ഗോവിന്ദ് പത്മസൂര്യ അയണിക് ഫൈവിന്റെ സീറ്റിൽ കയറിയപ്പോൾ ആദ്യം പറഞ്ഞത് ഇങ്ങനെ അലെക്സയുടെയൊക്കെ ഉള്ളിൽ ഇരിക്കാൻ കഴിഞ്ഞാൽ ഒരുപക്ഷേ ഇതേ ഫീലായിരിക്കും. അയണിക് ഫൈവിന്റെ ഫ്യൂച്ചറിസ്റ്റിക് ഡിസൈനിനും ടെക്കി സ്വഭാവത്തിനും ഇതിലും നല്ലൊരു സർട്ടിഫിക്കറ്റ്  വേറെയില്ല. ഡൽഹി ഓട്ടോഎക്സ്പോയിൽ ഷാറുഖ് ഖാനാണ് അയണിക് 5 അവതരിപ്പിച്ചത്. അന്ന് അവിടെ ഹ്യുണ്ടയുടെ ഇലക്ട്രിക് ഗ്ലോബൽ മോഡുലാർ പ്ലാറ്റ്ഫോം (ഇ-ജിഎംപി) പ്രദർശിപ്പിച്ചിരുന്നു. ബാറ്ററി വാഹനങ്ങൾക്കു മാത്രമായിട്ടുള്ള ആ പ്ലാറ്റ്ഫോമിൽ ഉയർത്ത പ്പെട്ട ആദ്യ വാഹനമാണ് അയണിക് 5. മറ്റുള്ള ഇ-വാഹനങ്ങൾ പെട്രോൾ-ഡീസൽ എൻജിനു കൾക്കായി ഡിസൈൻ ചെയ്യപ്പെട്ടതും പിന്നീട് ഇവിയായി മാറ്റപ്പെട്ടതുമാണ്. അതുകൊണ്ട് പെർഫോമൻസിൽ കുറവുണ്ടാകും. അയണിക് 5 അത്തരമൊരു വാഹനമല്ല. അയണിക് 5 എങ്ങനെയൊക്കെയാണ് ഐക്കണിക് ആകുന്നത് എന്നു വിശദമായി അറിയാം.

രൂപകൽപന

ചെത്തിമിനുക്കിയ രത്നക്കല്ലിൽ കാണുന്നതുപോലെ ഷാർപ് ലൈനുകളാണ് അയണിക് ഫൈവിന്. അതിനു മേമ്പൊടിയായി പാരാമെ ട്രിക് പിക്സൽ എൽഇഡി ഹെഡ്/ ടെയിൽ ലാംപുകൾ, ബംപറിനും ലാംപിനും ഇടയിൽ രാത്രിയിൽ ആക്സന്റ് ലൈറ്റിങ് കൂടിയുണ്ട്. ആരും രണ്ടാമതൊന്നുകൂടി നോക്കിപ്പോകും ഡിസൈൻ കണ്ടാൽ.

20 ഇഞ്ച് ഭീമൻ ടയറുകൾ. (ബിഎംഡബ്ല്യു എക്സ് 3 മുതലുള്ള മോഡലുകളിൽ ഇതേ സൈസാണ്). അതിസുന്ദരമായ പാരാമെട്രിക് ഡിസൈൻ തന്നെ അലോയ് വീലും പിന്തുടരുന്നു. നിർത്തിയിടുമ്പോഴും ഓടുന്ന ഫീലാണ് ഈ വീൽ കാണുമ്പോൾ. മാറ്റ് ഫിനിഷ്ഡ് ബോഡി കൗതുകകരം. അയണിക് ഫൈവിന്റെ നിറങ്ങളെല്ലാം സൗത്ത് കൊറിയയിലെ പ്രദേശങ്ങളിൽ നിന്നു പ്രചോദനം കൊണ്ടതാണ്.

വിശാലമായി തുറക്കുന്ന ഡോറുകൾ. എവിയാണെങ്കി ലും ആനപ്പൊക്കമില്ലാത്തതിനാൽ കയറാനും ഇറങ്ങാനും എളുപ്പം. നടന്നുതന്നെ ഉള്ളിലേക്കു കയറാമെന്നതു പ്രായമായവർക്കു ഗുണകരമാണ്. ഹ്യുണ്ടേയ് മോട്ടർ ഇന്ത്യയുടെ ലൈനപ്പിൽ ഏറ്റവും ഡോർ ഗ്രൗണ്ട് ക്ലിയറൻസുള്ളത് അയണിക് ഫൈവിനാണ് (163 മിമീ).