N ലൈനിൽ N ഊരിലേക്ക്

വയനാട്ടിലെ പുതിയ ലൊക്കേഷൻ- എൻ ഊര് മുന്തിയ പെർഫോമൻസുമായി വെന്യു- എൻ ലൈൻ

- Praveen

ഹ്യുണ്ടേയ് വെച്ചു എൻ ലൈൻ മോഡലുമായുള്ള യാത്രാദിനത്തിൽ വയനാടും എറണാകുളവും ഒരു പോലെ മൂടിക്കെട്ടി നിന്നിരുന്നു.

 ബ്രഹ്മപുരത്തെ മാലിന്യമല തീപിടിച്ച് നഗരത്തെ ചൂടിലും പുകയിലും മുക്കിയപ്പോൾ  വൈത്തിരിക്കടുത്ത ചെമ്പമല മൂടൽമഞ്ഞിനാൽ തണുപ്പു നൽകി എന്ന വ്യത്യാസം മാത്രം. എത്രയും പെട്ടെന്നു നഗരം വിട്ടാൽ മതി എന്നുണ്ടായിരുന്നതുകൊണ്ടാകാം എൻലൈൻ എന്ന പെർഫോമൻസ് വിഭാഗത്തിന്റെ വാഹനം തന്നെ യാത്രയ്ക്കൊരുങ്ങി വന്നത്. വെന്യു എൻ ലൈനിലേറി വയനാടിന്റെ പുതിയ ഗോത്രക്കാഴ്ചയായ എൻ ഊരിലേക്ക്.

എൻലൈൻ

ഇത്തവണ പുലർച്ചെ യാത്രയുണ്ടായിരുന്നില്ല. അതുകൊണ്ടുതന്നെ റോഡളന്നു പോകേണ്ടി വന്നു. ദേശീയപാതയുടെ പണികളോരോന്നും കണ്ടറിഞ്ഞും അതിന്റെ ഭാഗമായുള്ള തിരക്കു കൊണ്ടറിഞ്ഞുമായിരുന്നു യാത്ര. സത്യം പറഞ്ഞാൽ തൃശ്ശൂർ കോഴിക്കോട് പാതയിൽ എൻലൈൻ എൻജിൻ ശ്വാസംമുട്ടിയാണു പോയിരുന്നത്. ഹ്യുണ്ടയുടെ പെർഫോമൻസ് വിഭാഗമായ എൻലൈൻ വാഹനങ്ങൾക്ക് സിക്സ് ലെയ്ൻ പാതയൊക്കെ വേണം ഒന്നു ചിറകുവിരിക്കാൻ. സാധാരണ വാഹനങ്ങളുമായി ഇവ എന്താണു വ്യത്യാസം? 1 ലീറ്റർ ടർബോ എൻജിൻ. 120 ബിഎച്ച്പി കരുത്ത്. 7 സ്പീഡ് ഡ്യുവൽ ക്ലച്ച് ഓട്ടമാറ്റിക് ഗിയർ! പോരേ പൊടിപൂരം! അപ്പോൾ ഇന്ധനക്ഷമത? പെർഫോമൻസ് വേണമെന്നുള്ളവർക്കാണ് എൻലൈൻ.

ഉൾവഴികളിലൂടെ

കരിന്തണ്ടൻ കാണിച്ചുകൊടുത്ത താമരശ്ശേരിച്ചുരം കയറിയെത്തുന്ന സഞ്ചാരികൾ ആദ്യം സന്ദർശിക്കുന്നത് പൂക്കോട് തടാകമാണ്. ഇനി അതു മാറും. എൻ ഊര് എന്ന ഗോത്ര പൈതൃകഗ്രാമത്തിന്റെ കാഴ്ചകളാണ് ടൂറിസ്റ്റുകളെ വരവേൽക്കുക. കരിന്തണ്ടൻ കോളനി ഊരുമൂപ്പനാണ് എൻ ഊരിന്റെ സെക്രട്ടറി. ഗോത വിഭാഗക്കാരുടെ ഉന്നമനത്തിനുള്ള ഈ പുത്തൻ പ്രോജക്ട് അറിയും മുൻപ് മേപ്പാടിയിലേക്കു പോകാം.