മുള്ളോളം മധുരം

ഭർത്താവു കിടപ്പിലായതോടെ അഞ്ചു പെൺമക്കളടങ്ങുന്ന കുടുംബത്തിന്റെ ഉത്തരവാദിത്തങ്ങൾ ഏറ്റെടുത്തു റെജീന ജോസഫ്. കൃഷിയിലൂടെ ജീവിതവിജയം നേടിയ വീട്ടമ്മയുടെ കഥ

- ഡെൽന സത്യരത്ന

ജീവിതത്തിന്റെ ജീപ്പ് നിയന്ത്രണം വിട്ട് ഇറക്കമിറങ്ങി റെജീന ജോസഫിന്റെ മുന്നിൽ സഡൻ ബ്രേക്കിട്ട് നിന്നു. ഇനി എങ്ങനെ മുന്നോട്ടു പോകുമെന്നറിയാതെ നിന്ന ആ ദിവസം ഇന്നും റെജീനയുടെ ഓർമയിലുണ്ട്.

12 വർഷം മുൻപു ഭർത്താവ് ജോർജ് ഫ്രാൻസി കാലുകൾ തളർന്നു കിടപ്പിലായി. അന്നു വരെ ജീവിതവണ്ടി ഡ്രൈവ് ചെയ്യുന്നതിനെക്കുറിച്ച് റെജീനയ്ക്കു ചിന്തിക്കേണ്ട സാഹചര്യം വന്നിട്ടില്ല.

പക്ഷേ, വണ്ടി മുന്നോട്ടു പോയേ പറ്റൂ. അഞ്ചു പെൺമക്കൾ. ഇളയവളായ ലിൻഡ രണ്ടു വയസ്സായിരുന്നു അന്നു പ്രായം. ആ പ്രതിസന്ധിയിൽ നിന്നു പുറത്തുകടക്കാൻ കയ്യിലുള്ള കൊന്തയും പ്രാർഥനാ പുസ്തകവുമായിരുന്നു റെജീനയുടെ ധൈര്യ വും ആശ്വാസവും.

മുന്നോട്ടുപോകാൻ മറ്റുവഴികളില്ല. ആ തിരിച്ചറിവിൽ റെജീന ജീവിതത്തിന്റെ ഡ്രൈവിങ് സീറ്റിലേക്കു കയറിയിരുന്നു. അമ്മ പോരിനിറങ്ങുമ്പോൾ ആ ധൈര്യം ആദ്യം പകർന്നു കിട്ടുക പെൺമക്കൾക്കാണ്. അമ്മയുടെ ആത്മവിശ്വാസത്തിന്റെ അഞ്ചു വെളിച്ചങ്ങളായി അവർ വളർന്നു. വിധിയുടെ സഡൻ ബ്രേക്കിൽ ഇടറാതെ അതിനെ അതിജീവിച്ച് റെജീനയുടെ ജീവിത കഥ കേൾക്കാം.

പതറാതെ നേടിയ പുഞ്ചിരി

“മക്കളെ വളർത്തലും വീട്ടുജോലികളുമേ അതു വരെ ഞാൻ ശ്രദ്ധിച്ചിരുന്നുള്ളൂ. പതിനഞ്ചേക്കറോളമുള്ള കൈതച്ചക്ക കൃഷിയായിരുന്നു കുടുംബത്തിന്റെ പ്രധാന വരുമാന മാർഗം. അദ്ദേഹത്തിന് അതു മുന്നോട്ടു കൊണ്ടുപോകാൻ കഴിയില്ല. ഒന്നു തിരിഞ്ഞു കിടക്കണമെങ്കിൽപ്പോലും സഹായം വേണ്ടി വരുന്ന അവസ്ഥയായിരുന്നു ജോർജിന് അന്ന്.

പക്ഷേ, ആ വിഷമഘട്ടത്തിൽ ഒപ്പമുണ്ടായിരുന്ന തൊഴിലാളികൾ പൂർണ പിന്തുണ നൽകി. "കൃഷി നിർത്തരുത്. ഞങ്ങൾ തുടർന്നു ചെയ്തോളാം. മേൽ നോട്ടവും നിർദേശങ്ങളും കിട്ടിയാൽ മതി. ശരിക്കും ജീവിതത്തെ മൂടിയ കയ്പിനിടിയിൽ കിട്ടിയ ഒരു നുള്ളു മധുരമായിരുന്നു അവരുടെ വാക്കുകൾ.