ഹൃദയബന്ധങ്ങൾക്ക് സന്തോഷമരുന്ന്

വീട്ടിലും ഓഫിസിലും ബന്ധങ്ങൾ ഊഷ്മളമാക്കി സന്തോഷത്തോടെ മുന്നോട്ടു കൊണ്ടുപോവാനുള്ള വഴികൾ.

- വിജീഷ് ഗോപിനാഥ്

റൂബിക്സ് ക്യൂബുകൾ കണ്ടിട്ടില്ലേ, നാലു വശവും കറക്കിയും തിരിച്ചും മറിച്ചും ഒരേ നിറമാക്കിയാൽ വിജയിക്കുന്ന ക്യൂബ് പോലെയാണ് ഏതു ബന്ധത്തിലും സന്തോഷം. കൃത്യമായ കണക്കിൽ ക്യൂബിലെ ചെറുകട്ടകൾ തിരിച്ചാൽ അത് ഒരേ നിറമായി കിട്ടും. തോന്നിയപോലെ തിരിച്ചും മറിച്ചും നോക്കിയാൽ പാളിപ്പോവും. അതുപോലെ ബന്ധങ്ങളെക്കുറിച്ച് അറിയാതെ, പരിഗണിക്കാതെ മുന്നോട്ടു പോയാൽ വിജയിക്കണം എന്നില്ല.

വീട്ടിലായാലും ഓഫിസിലായാലും ബന്ധങ്ങളിൽ സന്തോഷം നിറയ്ക്കണമെങ്കിൽ അതിനു വേണ്ടി ശ്രമിച്ചേ പറ്റൂ. ചെറിയ ചില മാറ്റങ്ങളിലൂടെ ബന്ധങ്ങളെ ഊഷ്മളമാക്കാം. പെട്ടെന്നു ഗുണം കിട്ടുന്ന സന്തോഷമരുന്നുകൾ ഇതാ...

ചിരിവീടിനായി 10 വഴികൾ

1. ദാമ്പത്യ ബന്ധം വളർത്താൻ 7-7-7 ടെക്നിക്: 7 ദിവസം കൂടുമ്പോൾ ഒരുമിച്ചു പുറത്തു പോകുക, 7 ആഴ്ച കൂടുമ്പോൾ ബന്ധുവീടുകളിൽ പോവുക, സുഹൃത്തുക്കളെ സന്ദർശിക്കുക, 7 മാസം കൂടുമ്പോൾ ഒരുമിച്ച് ഒന്നോ രണ്ടോ ദിവസത്തെ യാത്ര പോകുക- ഇതാണ് കുടുംബബന്ധങ്ങളിൽ സന്തോഷം നിറയ്ക്കാനുള്ള 7-7-7 ടെക്നിക്.

മൂന്നു തരം യാത്രയാക്കി മാറ്റാം ഭാര്യയും ഭർത്താവും മാത്രം പോവാം. രണ്ടാമത്തെ യാത്രയിൽ കുട്ടികൾക്കൊപ്പം പോവാം. അടുത്ത പ്രാവശ്യം വീട്ടിലുള്ള മുതിർന്നവരെയും കൂട്ടുക. ഇങ്ങനെ മൂന്നു തരത്തിലാവുമ്പോൾ വീട്ടിൽ എല്ലാവർക്കും പ്രാധാന്യം ലഭിക്കും.

2. ഒന്നിച്ചുള്ള വ്യായാമം: ജിമ്മിൽ പോവുന്നതും നടക്കാൻ പോവുന്നതും യോഗ ചെയ്യുന്നതുമെല്ലാം ഒന്നിച്ചാക്കാം. കുട്ടികൾ സ്കൂളിൽ പോവുന്നതിനിടയിൽ എവിടെയാണു വ്യായാമത്തിനു സമയം എന്നാണു ചോദിക്കാനുള്ളതെങ്കിൽ അടുക്കളയിൽ ഒരു മണിക്കൂർ പങ്കാളികൾ ഒന്നിച്ചു ചെലവഴിക്കുക. ജോലിയിൽ സഹകരിക്കുക. ഇതും പൊസിറ്റീവ് എനിർജി നൽകും.