LIFE ON ROADS പുതുമണ്ണു തേടി

ലക്ഷ്യത്തേക്കാൾ യാത്രയിലെ കാഴ്ചകളെയും അനുഭവങ്ങളെയും സ്നേഹിക്കുന്ന സംഗീതും കാവ്യയും

- ഡെൽന സത്യരത്ന

പാലക്കാട് പട്ടാമ്പിയിലെ സംഗീതിന്റെ വീട് പച്ചപ്പും ഹവും നിറഞ്ഞ മലയാളി വീടുകളുടെ നേതാവാണന്നു തോന്നും. പറമ്പിൽ തലയുയർത്തി നിൽക്കുന്ന ചെമ്പരത്തിയും നനഞ്ഞ് ഇലകൾ അൽപം കുമ്പിട്ടു നിൽക്കുന്ന ഇഞ്ചിച്ചെടിയുമെല്ലാം രാജ്യത്തിന്റെ പല കോണുകളിലുള്ളവരുടെ ശ്രദ്ധയും സ്നേഹവും നേടുകയാണ്. ലൈഫ് ഓൺ റോഡ്സ് എന്ന ഇൻസ്റ്റഗ്രാം പേജിൽ വീട്ടിലെ കിണറും അടയ്ക്കാമരവും മുതൽ കാവ്യയുടെ അച്ഛന്റെ കസേരയും കണ്ണടയും മുപ്പതുകളിലെത്തിയ സംഗീതിന്റെ കളിപ്പാട്ടങ്ങളും വരെ താരങ്ങളാണ്.

ഒരു മില്യണിലധികം ഫോളോവേഴ്സുള്ള പേജ് ഈ വ്യത്യസ്തരായ ദമ്പതികളെപ്പോലെ തന്നെ ഹൃദയങ്ങൾ കീഴടക്കിയാണു യാത്ര. പുറപ്പെടണമെന്നു തോന്നിയാൽ സാധനങ്ങൾ പായ്ക്ക് ചെയ്തു ജീപ്പുമെടുത്തു നേരേയൊരു പോക്കാണ്. കണ്ടറിഞ്ഞും കേട്ടറിഞ്ഞും അനുഭവിച്ചും സൂര്യനൊപ്പം ഉണർന്നും ഉറങ്ങിയും സുരക്ഷിതമെന്നു തോന്നുന്നിടത്തു ക്യാംപ് ചെയ്തും ആ യാത്ര നീളും. തിരികെ നാട്ടിലെത്തുന്നതു നിറഞ്ഞ ഹൃദയവും പഠിച്ച് പുതിയ പാഠങ്ങളും കൂട്ടിനു കിട്ടിയ സൗഹൃദങ്ങളുമായാണ്. വഴിയിൽ പരിചയപ്പെടുന്ന നല്ല മനുഷ്യരുടെ കഥകൾ പേജിലൂടെ പങ്കുവയ്ക്കാറുണ്ട്. യാത്രകളിലെല്ലാം കൂട്ടിനു വളർത്തുനായ ഡോഗോയുമുണ്ട്. അപ്പുവെന്നാണ് ഡോഗോയുടെ ചെല്ലപ്പേര്.

ഇനിയേതു സ്ഥലത്തേക്കു പോകാനാണ് ഇഷ്ടമെന്നു ചോദിച്ചാൽ സോഫ്റ്റ്വെയർ കൺസൽറ്റന്റായ വി.വി. സംഗീത് പറയും “യാത്രയുടെ ലക്ഷ്യം യാത്ര തന്നെയാണ്. എത്തിച്ചേരുന്ന സ്ഥലത്തേക്കാൾ പ്രാധാന്യം യാത്രയിലെ കാഴ്ചകൾക്കും അനുഭവങ്ങൾക്കുമാണ്. അത്തരത്തിലുള്ള ഓവർലാൻഡിങ് യാത്രകളാണു ഞങ്ങൾ കൂടുതലും ചെയ്യാറുള്ളത്. പ്രകൃതിക്കോ മനുഷ്യർക്കോ മറ്റു ജീവികൾക്കോ ദ്രോഹമുണ്ടാക്കാതെ ലളിതമായി ജീവിക്കാനും യാത്ര ചെയ്യാനും ശ്രദ്ധിക്കാറുണ്ട്.

ഇന്ത്യൻ ഫോഴ്സ് ഗൂർഖ വാനിലാണ് ഇവരുടെ മിക്ക യാത്രകളും. ഓഫ് റോഡും കരുത്തോടെ ഓടിക്കയറുന്നതു കൊണ്ടു വണ്ടിക്കു ഭീമൻ എന്നു പേരിട്ടു. കഴിഞ്ഞ മൂന്നര വർഷമായി വഴികൾ തേടിയും ലക്ഷ്യം മറന്നുമുള്ള യാത്രയിൽ ഭീമനും കൂട്ടുണ്ട്. ഭക്ഷണം പാകം ചെയ്യാനും കിടന്നുറങ്ങാനും അത്യാവശ്യമായി വേണ്ട ലളിതമായ സന്നാഹങ്ങളും ടെന്റും പോർട്ടബിൾ ടോയ്ലറ്റും ഭീമൻ ചുമക്കും. ഏകദേശം 20000 രൂപയേ ഈ സൗകര്യങ്ങളൊരുക്കാൻ വേണ്ടി വന്നുള്ളൂ.