Reba's Journey ON Screen Road

തെന്നിന്ത്യൻ നായിക റേബാ ജോണിന്റെ യാത്രകളും ജീവിതത്തിലെ പുതിയ വിശേഷങ്ങളും

- അഞ്ജലി അനിൽകുമാർ

നിവിൻ പോളിക്കൊപ്പം കെഎസ്ആർടിസി ബസിൽ ആരംഭിച്ചതാണു റേബാ ജോണിന്റെ സിനിമായാത്ര. 10 വർഷം മുൻപു ജേക്കബിന്റെ സ്വർഗരാജ്യം എന്ന ചിത്രത്തിലൂടെ. പിന്നെ, മലയാളത്തിന്റെ അതിരുകൾ കടന്നു തമിഴും തെലുങ്കും താണ്ടി ആ സഞ്ചാരം തുടരുന്നു. ഹിറ്റുകളുടെ മൈൽ സ്റ്റോണുകൾ പിന്നിട്ടു പാൻ സൗത്ത് ഇന്ത്യൻ ആക്ടറെസ്സ് എന്ന കിരീടം ചൂടി നിൽക്കുന്നു നായിക.

രജനികാന്തിനൊപ്പം കൂലി, വിജയ്ക്കൊപ്പം ബിഗിൽ, ഇപ്പോൾ മാഡ്സ്ക്വയർ എന്ന തെലുങ്ക് സിനിമയിലെ സ്വാതി റെഡ്ഢി എന്ന ഗാനരംഗത്തിലുടെ വൈറൽ സ്റ്റാറുമായി ഈ മിടുക്കി.

12 വർഷം മുൻപ് മഴവിൽ മനോരമയിലെ "മിടുക്കി' ഷോയിലൂടെയാണ് റേബ ആദ്യമായി ക്യാമറയ്ക്ക് മുന്നിലെത്തുന്നത്.

മിടുക്കിയാണോ ജീവിതത്തിൽ വഴിത്തിരിവായത്?

"മിടുക്കി'യിൽ ഞാൻ പങ്കെടുക്കാൻ കാരണം പപ്പയുടെ അനിയനാണ്. "നീ പങ്കെടുക്കണം. നിനക്കു സാധിക്കുമെന്നു പറഞ്ഞത് റെജി അങ്കിളാണ്. പക്ഷേ, ഷോയിൽ അവസരം ഉറപ്പായപ്പോൾ ടെൻഷനായി. ഞാനില്ലെന്നു പറഞ്ഞ് ഒഴിവാകാൻ ശ്രമിച്ചപ്പോൾ ഷോ ഡയറക്ടർ സതീഷ് സർ പറഞ്ഞു.

"നിന്റെയുള്ളിലെ കഴിവു നിനക്കറിയില്ല. ഭീരുക്കളാണു പകുതി വ ഴിയിൽ വെല്ലുവിളികൾ ഉപേക്ഷിക്കുക' എന്ന്. സതീഷ് സാറും അങ്കിളും എന്നിൽ അത്ര വിശ്വാസം കാണിച്ചില്ലായിരുന്നെങ്കിൽ ഞാനൊരിക്കലും ഇത്രദൂരം എത്തുമായിരുന്നില്ല. മിടുക്കി ഷോയിൽ സെക്കൻഡ് റണ്ണറപ് ആയിരുന്നു.

മാഡ് സ്ക്വയറിലെ സ്വാതി റെഡ്ഢി' ഗാനം തരംഗമായല്ലോ?

ഡാൻസ് ചെയ്യാനിഷ്ടമാണെങ്കിലും സിനിമയിൽ ഇതുവരെ ഫുൾ ഓൺ ഡാൻസ് നമ്പർ ചെയ്യാൻ ചാൻസ് കിട്ടിയിട്ടില്ല. അങ്ങനെയാണു സ്വാതി റെഡ്ഢിക്കു കൈകൊടുക്കുന്നത്. യഥാർഥത്തിൽ അതൊരു നാടൻ പാട്ടാണ്. പാട്ടിന്റെ എനർജിയും വൈബും ഇഷ്ടമായതു കൊണ്ടുതന്നെ ആസ്വദിച്ചാണ് അഭിനയിച്ചത്. പാട്ട് റിലീസായപ്പോൾ ഒരു പാടുപേർ ചോദിച്ചു, "റേബാ ഡാൻസ് ചെയ്യുമോ?' എന്ന്. തെലുങ്കിൽ മൃത്യുഞ്ജയ് ആണു പുതിയ റിലീസ്.

തുടക്കം മലയാളത്തിലാണെങ്കിലും റേബയെ മലയാളികൾക്കു കിട്ടുന്നേയില്ലല്ലോ?

മലയാളത്തിൽ സിനിമകൾ ചെയ്യാതിരിക്കുന്നതു മനപ്പൂർവ മല്ല. ചില വേഷങ്ങൾ എനിക്കു ചേരില്ലെന്നു തോന്നും. ജേ ക്കബിന്റെ സ്വർഗരാജ്യത്തിനു പിന്നാലെ ഒരുപാട് അവസരങ്ങൾ വന്നു. അന്നു ഞാൻ ബാംഗ്ലൂർ ക്രൈസ്റ്റ് യൂണിവേ ഴ്സിറ്റിയിൽ പഠിക്കുകയാണ്. പഠനത്തിനു പ്രാധാന്യം നൽകിയതുകൊണ്ടു പല സിനിമകളും ചെയ്യാൻ സാധിച്ചില്ല.