അമ്മക്കവിതയിൽ വിരിഞ്ഞ പൂക്കൾ

23 വർഷത്തെ ഇടവേളയ്ക്കുശേഷം സിനിമയിൽ സജീവമാകുമ്പോൾ കവിതയ്ക്കു പറയാൻ ഒരായിരം വിശേഷങ്ങളുണ്ട്

- അഞ്ജലി അനിൽകുമാർ

മലയാളത്തിലെ മികച്ച ഹൊറർ കോമഡി ചിത്രങ്ങളിലൊന്നായ പകൽ പൂരത്തിൽ മുകേഷിന്റെ നായികയായെത്തിയ പെൺകുട്ടിയെ പിന്നീടൊരിക്കലും മലയാളികൾ കണ്ടില്ല. പകൽപ്പൂരത്തിൽ അനാമികയായെത്തിയ ഡോ. കവിത ജോസ് കോഴിക്കോട് കോവൂരെ വീട്ടിലുണ്ടിപ്പോൾ.

ഒരേയൊരു സിനിമ മാത്രം അഭിനയിച്ചു പിൻവാങ്ങിയ കവിത 23 വർഷത്തിനു ശേഷം വീണ്ടും അഭിനയത്തിലേക്കു മടങ്ങിയെത്തിയിരിക്കുന്നു. മനോരമ മാക്സിൽ റിലീസായ പത്തുമാസം എന്ന സിനിമയിലൂടെ സന്തോഷത്തിന് ഇരട്ടി മധുരമേകാൻ കവിതയുടെ മകൾ റെയ്സയും ചിത്രത്തിൽ അഭിനയിച്ചിട്ടുണ്ട്. ചലച്ചിത്രതാരം എന്നതിനപ്പുറം ഡോക്ടർ, സംരംഭക, എഴുത്തുകാരി, ബിൽഡർ, ഇന്റീരിയർ ഡിസൈനർ എന്നിങ്ങനെ വ്യത്യസ്ത റോളുകളിൽ ബിസിയാണു കവിത.

തേടിവന്ന പത്തുമാസം

“പകൽപ്പൂരം കഴിഞ്ഞ് 23 വർഷമായെന്നു ചിന്തിക്കാനാകുന്നില്ല. സുഹൃത്തും ഛായാഗ്രാഹകനുമായ സുധീറാണ് പത്തുമാസത്തെക്കുറിച്ചു പറഞ്ഞത്. സിനിമയിലെ നായിക പ്രസീതയെക്കുറിച്ചു കേട്ടപ്പോൾ അഭിനയിക്കണമെന്നു തോന്നി.

എങ്കിലും വീട്ടിലെ സാഹചര്യമോർത്തപ്പോൾ മനസ്സ് പിന്നോട്ടാഞ്ഞു. എന്നാൽ, റോഷനും മക്കളും ചാച്ചയും പൂർണ പിന്തുണ പ്രഖ്യാപി ച്ച് ഒപ്പം നിന്നു. സിനിമയിലേക്ക് എന്നെ കാസ്റ്റ് ചെയ്തപ്പോൾ തന്നെ മകൾ റെയ്സയെ കൂടി അഭിനയിപ്പിക്കണമെന്നു സംവിധായകരായ സുമോദ് സാറും ഗോപു സാറും പറഞ്ഞിരുന്നു. മോൾക്കും താൽപര്യമായിരുന്നു. അങ്ങനെ പ്രസീദയായി ഞാനും നിധിയായി മോളും എത്തി.

റെയ്സ: സ്കൂളിൽ ആർട്സിലൊക്കെ സജീവമാണ്. പക്ഷേ, ക്യാമറയ്ക്കു മുന്നിൽ ഇതാദ്യമാണ്. അമ്മ തന്നെയായിരുന്നല്ലോ സിനിമയിലും അമ്മ. അതുകൊണ്ടു പലപ്പോഴും വീട്ടിലെ സീനുകൾ റിക്രിയേറ്റ് ചെയ്യുന്നതു പോലെയേ തോന്നിയുള്ളൂ.

കവിത: എനിക്കു ചെറുപ്പം മുതലേ സിനിമയിൽ അഭിനയിക്കണമെന്ന മോഹമുണ്ടായിരുന്നു. മെഡിസിൻ പഠനം പൂർത്തിയാക്കി കോഴിക്കോട് ബേബി മെമ്മോറിയൽ ഹോസ്പിറ്റലിൽ ജൂനിയറായി പ്രാക്ടീസ് ചെയ്യുമ്പോഴാണ് പകൽപ്പൂരത്തിൽ അഭിനയിക്കുന്നത്. വീട്ടിൽ നിന്നു ചെറിയ എതിർപ്പൊക്കെ ഉണ്ടായിരുന്നെങ്കിലും അച്ഛൻ ജോസ് ഞെള്ളിമാക്കൽ കട്ട സപ്പോർട്ടായിരുന്നു. ചാച്ച കലാകാരനും കലാസ്വാദകനുമാണ്. "നഷ്ടപ്പെടുത്തിയ അവസരത്തെയോർത്തു മോൾ വിഷമിക്കേണ്ടി വരരുത്. എന്തായാലും ശ്രമിച്ചു നോക്കൂ' എന്നു പറഞ്ഞ് അന്നു തന്ന അതേ സപ്പോർട്ട് ചാച്ച ഇപ്പോഴും തരുന്നുണ്ട്.