സ്വർണം വളരും നിധിയാകും

ദീർഘകാല സ്വർണ നിക്ഷേപം നഷ്ടമുണ്ടാക്കിയ ചരിത്രമില്ല എന്നതാണു സവിശേഷത

- ചൈത്രാലക്ഷ്മി

ഏറ്റവും പ്രിയമുള്ളൊരാളെ ജീവിതത്തിലേക്കു കൂട്ടുമ്പോൾ "പൊന്നു പോലെ നോക്കിക്കോളാം' എന്നു പറഞ്ഞു നോക്കൂ. ഇതിലും മനോഹരമായ വാഗ്ദാനം ഈ ഭൂമിമലയാളത്തിലുണ്ടാകില്ല.

പൊന്നെന്ന വാക്കിനോടു പോലും അത്ര പ്രിയമാണു മലയാളിക്ക്. അഭിമാനത്തിന്റെയും ആഡംബരത്തിന്റെയും പ്രതീകം. വില എത്ര ഉയരങ്ങൾ താണ്ടിയാലും സ്വർണം വാങ്ങിക്കൂട്ടാനുള്ള മത്സരത്തിന് ഒരു കുറവുമുണ്ടാകില്ല. നിക്ഷേപം എന്ന നിലയിൽ എന്നും സ്വർണത്തിനു പത്തിൽ പത്തു മാർക്കാണ്. ശരിയായ രീതിയിൽ സ്വർണം നിക്ഷേപിക്കുന്നതിനു ശ്രദ്ധിക്കേണ്ട കാര്യങ്ങൾ അറിയാം.

ഉറപ്പാണ് നേട്ടം

ആഭരണങ്ങൾ, നാണയം, ഗോൾഡ് ബാർ തുടങ്ങിയ രൂപത്തിൽ സ്വർണം വാങ്ങി സൂക്ഷിക്കുന്നവരേറെയാണ്. ഇവ ഭാവിയിൽ കൂടുതൽ മൂല്യത്തോടെ വിൽക്കാൻ കഴിയും.

ഡിജിറ്റൽ സ്വർണത്തോടാണു പുതിയ കാലത്തു പ്രിയം. ഗോൾഡ് മ്യൂച്വൽ ഫണ്ട്, ഗോൾഡ് ഇടിഎഫ്, ആർബിഐയുടെ സോവറിൻ ഗോൾഡ് ബോണ്ട് ഇവയിൽ നിക്ഷേപിക്കാം.

പരമ്പരാഗത പദ്ധതികളിൽ പണം നിക്ഷേപിക്കുമ്പോൾ ചില ഘടകങ്ങൾ മൂലം ലഭിക്കുന്ന നേട്ടത്തിന്റെ മൂല്യം കുറയാം. അതിൽ പ്രധാനപ്പെട്ടതാണു പണപ്പെരുപ്പം. കറൻസിയുടെ മൂല്യം കുറയുകയും സാധനങ്ങളുടെ വില കൂടുകയും ചെയ്യുന്നു. എന്നാൽ വരുമാനമൊട്ടു കൂടുന്നുമില്ല. ഈ അവസ്ഥയാണു പണപ്പെരുപ്പം. നിക്ഷേപങ്ങളിൽ നേട്ടമുണ്ടായാൽപ്പോലും പണപ്പെരുപ്പം കണക്കിലെടുത്താൽ കയ്യിൽ കിട്ടുന്ന തുകയുടെ മൂല്യം കുറയും.

സ്വർണത്തിന്റെ മൂല്യം ജീവിത ചെലവിനൊപ്പം ഉയരാറുണ്ട്. ചരിത്രം നോക്കിയാലറിയാം. പലപ്പോഴും പണപ്പെരുപ്പത്തെ തോൽപ്പിച്ചു ശരാശരിയിലുമേറെ നേട്ടമാണു സ്വർണ നിക്ഷേപം നൽകുക.