ஆவணியின் அவதார தரிசனம்... கிருஷ்ணர்- விநாயகர்!

அருள் தழுவும் ஆயிரம் நாமங்களைக் கொண்டு அகிலத்தைக் காக்க எடுத்த புண்ணிய அவதாரம் ஸ்ரீகிருஷ்ண அவதாரம்!

- - மாலதி சுந்தரராஜன்

சக்ரத்தை எடுப்பது ஒரு கணம், தருமம் பாரில் தழைத்தல் மறுகணம் என்ற பாரதியின் வரிகளுக்கேற்ப, தர்மத்தை நிலைநாட்ட எடுத்த அற்புத அவதாரம் கிருஷ்ண அவதாரம்! மக்களின் நல்லரசனாய், கீதையை உலகுக்கே உபதேசித்த நல்லாசானாய், நட்பிற்கு இலக்கணமான நல்ல நண்பனாய், அடியார்களுக்கு உதவும் சேவகனாய், இடம், பொருள், ஏவல் அறிந்த சிறந்த மந்திரியாய், பண்பிலே தெய்வமாய் பரிமளிக்கும் அவதார நாயகன் கிருஷ்ணன்!

ஆவணி மாதம் அஷ்டமித் திதியில், ரோகிணி நட்சத்திரத்தில், நடு நிசியில் இருண்ட சிறைச் சாலையில், தேவகி நந்தனாக, ஞான ஒளியாக சங்கு சக்ரதாரியாக, அவதரித்தார் கிருஷ்ண பகவான்! ஒருத்தி மகனாய்ப் பிறந்து ஓரிரவில் ஒருத்தி மகனாய் வளர, அந்தகாரமான அந்த இரவில் கொட்டும் மழையில், பெருக்கெடுத்து ஓடும் ஆற்று வெள்ளத்தைக் கடந்து யசோதைக்கு மகனாய்ப் போய்ச் சேர்ந்தார்! நந்தகோபன்குமாரனாக, யசோதையின் இளம் சிங்கமாக கோகுலத்தில் எல்லோரும் விரும்பும் விஷமக்காரக்கண்ணனாக வளர்ந்து

வந்தார்பரந்தாமன்! கண்ணனின் குறும்பு விளையாட்டுகளில் இன்றும் மனதை பறி கொடுத்துக் கொண்டுதான் இருக்கிறோம்! ஸ்ரீ ராம அவதாரத்தில், மனிதனாக வாழ்ந்து காட்டினார் விஷ்ணு பகவான்; ஆனால் கிருஷ்ண அவதாரத்தில் மனித தெய்வமாக வாழ்ந்து காட்டினார்! கோவிந்தனை, கண்ணனை,பரமாத்ம சொரூபமாகவே கண்டு மகிழ்கிறோம்! விலங்கினம் முதல் தேவர் இனம் வரை அவன் பாதார விந்தங்களில் சரணடைந்தோர்க்கு சஞ்சலம் இல்லை! கஜேந்திரனின் ஆதிமூலமே என்ற நிர்கதியான அலறலைக் கேட்ட பரந்தாமன், பறந்தோடி வந்து தன் சக்ராயுதத்தால் கஜேந்திரனின் காலை பிடித்த முதலையை வதம் செய்து யானையை காப்பாற்றிய சுவையான நிகழ்வு நாம் அனைவரும் அறிந்ததே! வாரணம் அழைக்க வந்த காரணன் என்ற சிறப்பு அடைமொழியுடன் போற்றுகிறார் வேதாந்த தேசிகர்! இது வெறும் கதையல்ல! சரணாகதி தத்துவத்தின் பெருமையை விளக்கும் உயர்ந்த நிகழ்வு கஜேந்திர மோட்சம்!