பலத்த பாதுகாப்புடன் விநாயகர் சிலைகள் விசர்ஜன ஊர்வலம்

திருவள்ளூர் அருகே கடம்பத்தூர் பகுதியில் பிரதிஷ்டை செய்யப்பட்ட 50 விநாயகர் சிலைகள் ஞாயிற்றுக்கிழமை ஊர்வலமாக எடுத்துச் சென்று கூவம் ஆற்றில் விசர்ஜனம் செய்யப்பட்டன.

- 

திருவள்ளூர்/காஞ்சிபுரம்/செங்கல்பட்டு, ஆக.31:

விநாயகர் சதுர்த்தியையொட்டி மாவட்டம் முழுவதும் 877 சிலைகள் வரையில் இந்து முன்னணி உள்ளிட்ட பல்வேறு அமைப்புகள் பிரதிஷ்டை செய்திருந்தனர். ஏற்கெனவே மூன்றாவது நாளில் திருவள்ளூர் பகுதிகளில் விநாயகர் சிலைகள் விசர்ஜனம் செய்யப்பட்டன.

5 -ஆம் நாளான ஞாயிற்றுக்கிழமை பேரம்பாக்கம், கடம்பத்தூர், புதுமாவிலங்கை, எம்.ஜி.ஆர்.நகர், அகரம், நரசிங்கபுரம், கூவம், மப்பேடு, கீழச்சேரி, இருளஞ்சேரி போன்ற சுற்றுவட்டார பகுதிகளில் வழிபாடு செய்யப்பட்ட 50-க்கும் மேற்பட்ட சிலைகள் ஊர்வலமாக எடுத்துச் சென்று கூவம் ஆற்றில் விசர்ஜனம் செய்யப்பட்டன. இந்த ஊர்வலத்தில் அசம்பாவித சம்பவங்களை தடுக்கும் வகையில் கடம்பத்தூர் மற்றும் மப்பேடு போலீஸார் பாதுகாப்பு பணியில் ஈடுபடுத்தப்பட்டனர்.

காஞ்சிபுரத்தில்

காஞ்சிபுரத்தில் 20-க்கும் மேற்பட்ட விநாயகர் சிலைகள் ஊர்வலமாக கொண்டு வரப்பட்டு மாமல்லபுரம் கடற்கரையில் ஞாயிற்றுக்கிழமை விசர்ஜனம் செய்யப்பட்டது.

காஞ்சிபுரம் வேதாசலம் நகர், திருக்காலிமேடு, காந்தி சாலை உள்பட 20 இடங்களில் விநாயகர் சிலைகள் வைக்கப்பட்டு சிறப்பு தீபாராதனைகளும் நடைபெற்றன. தொடர்ச்சியாக விநாயகர் சிலை விசர்ஜன ஊர்வலம் நடைபெற்றது.