ஹெச்-1பி விசா கட்டணம் ரூ.88 லட்சம்

அமெரிக்க அதிபர் டிரம்ப் அறிவிப்பு; இந்தியர்களுக்குப் பாதிப்பு

- 

ஹெச்-1 பி விசா (நுழைவு இசைவு) கட்டணத்தை ஆண்டுக்கு ரூ.88 லட்சமாக (ஒரு லட்சம் டாலர்) உயர்த்தும் கோப்பில் அமெரிக்க அதிபர் டொனால்ட் டிரம்ப் வெள்ளிக்கிழமை கையொப்பமிட்டார். தற்போது ரூ.1.49 லட்சமாக உள்ள இந்தக் கட்டணம் அதிரடியாக உயர்த்தப்பட்டு ஞாயிற்றுக்கிழமை (செப். 21) முதல் அமலாகவுள்ளது.

இது அமெரிக்காவில் பணியாற்றிவரும் இந்தியர்களுக்கு, முக்கியமாக தகவல் தொழில்நுட்பப் பணியாளர்களுக்குப் பெரும் பாதிப்பை ஏற்படுத்தும் என எதிர்பார்க்கப்படுகிறது.

உலகம் முழுவதும் இருந்து திறமையான பணியாளர்களைத் தேர்வு செய்து அவர்களுக்கு அதிக ஊதியத்துடன் அமெரிக்காவில் வேலை வழங்க ஹெச்-1பி விசா நடைமுறையை அந்நாட்டு நிறுவனங்கள் பயன்படுத்தி வருகின்றன. கடந்த சில ஆண்டுகளாக ஹெச்-1பி விசா திட்டத்தின்கீழ் அனுமதிக்கப்பட்ட பணியாளர்களில் 71 சதவீதத்துடன் இந்தியா முதலிடத்திலும், சீனா இரண்டாவது இடத்திலும் உள்ளன.

டிரம்ப் உத்தரவு: கடந்த ஜனவரி மாதம் அமெரிக்க அதிபராகப் பொறுப்பேற்ற டிரம்ப் 'அமெரிக்கா முதலில்' என்ற கொள்கையின்படி உள்நாட்டு வேலைவாய்ப்புகளை அமெரிக்கர்களுக்கே வழங்க வேண்டும் என அந்நாட்டில் உள்ள பெரும் தொழில்நுட்ப நிறுவனங்களிடம் அறிவுறுத்தி வருகிறார்.