പെൻഷൻ: NPS നെക്കാൾ മികച്ചത് SWP, എന്തുകൊണ്ട്?

വിരമിക്കും മുൻപ് വരുമാനം നിലച്ചാലും ജീവിതാവസാനംവരെ ആവശ്യമായ പണം ഉറപ്പാക്കാം.

- ബാലചന്ദ്രൻ വിശ്വാറാം ഇൻഷുറൻസ്, മ്യൂച്വൽഫണ്ട് അഡ്വൈസർ

പെൻഷൻ പ്രോഡക്ടുകൾ ഏറ്റവും കൂടുതൽ ഉപകരിക്കുന്നത് സ്ഥിരവരുമാനക്കാർക്കാണ്. അറിഞ്ഞോ അറിയാതെയോ ഇവർക്കു സാമ്പത്തികഭദ്രത നൽകാൻ എൻപിഎപോലുള്ള പദ്ധതികൾക്കു സാധിച്ചിട്ടുണ്ട്. കിട്ടുന്ന ശമ്പളത്തിന്റെ ഒരു വിഹിതം സ്വയമോ സ്ഥാപനമോ ഒരു പെൻഷൻ പദ്ധതിയിൽ നിക്ഷേപിക്കുന്നു. റിട്ടയർ ചെയ്യുമ്പോൾ ഇതേ അക്കൗണ്ടിൽ നിന്നും മാസം പണം തിരിച്ചുകൊടുക്കുന്നു. ഇതാണ് പെൻഷൻ പ്രോഡക്ടിന്റെ പ്രവർത്തനരീതി.

നാഷനൽ പെൻഷൻ സ്കീമിന്റെ പ്രവർത്തനം അൽ പം വ്യത്യസ്തമാണ്. മൊത്തം സമാഹരിക്കുന്ന തുകയുടെ 60 ശതമാനമേ റിട്ടയർ ചെയ്യുമ്പോൾ പിൻവലിക്കാനാകൂ. ബാക്കി 40% തുകയ്ക്ക് അവർ ഒരു ആനുവിറ്റി പ്രോഡക്ട് വാങ്ങണം. എല്ലാ മാസവും നിശ്ചിത തുക ജീവിതാവസാനം വരെ ലഭിക്കുംവിധം നിക്ഷേപിക്കാവുന്ന പദ്ധതിയാണ് ആനുവിറ്റി.