വിഷു, ഈസ്റ്റർ വിപണി നാളികേരത്തിന് ആശ്വാസം

കമ്പോളം

-  കെ. ബി. ഉദയഭാനു ഇ-മെയിൽ: [e-mail]

നാളികേരോൽപന്ന വിപണിക്ക് ഈസ്റ്റർ ഡിമാൻഡ് പുതുജീവൻ പകർന്നത് വിഷുവരെ ആശ്വാസമായേക്കും. മിക്ക ഭാഗങ്ങളിലും വിളവെടുപ്പ് പൂർത്തിയായി. പച്ചത്തേങ്ങാവരവ് ഏതാനും ആഴ്ചകളായി കുറഞ്ഞ അളവിലാണ്.ശക്തമായ ചൂട് അവസരമാക്കി ഉൽപാദകർ തേങ്ങാവെട്ടിന് ഉത്സാഹിച്ചു. ചുരുങ്ങിയ ദിവസങ്ങളിൽ ഉണക്ക് കൂടിയ കൊപ്ര ഉൽപാദിപ്പിച്ചതിനാൽ ചരക്ക് ഏറെനാൾ കേടു കൂടാതെ സൂക്ഷിക്കാനാവും. ഇതിനിടയിൽ വിദേശ ഭക്ഷ്യയെണ്ണ ഇറക്കു മതി ചുരുങ്ങിയതും വെളിച്ചെണ്ണയുടെ മുന്നേറ്റത്തിനു ശക്തി പകരുന്നു. കൊപ്ര വില 9,500 രൂപ.

ഏലത്തിനു തകർച്ച

 കൊടും വേനലിൽ ഭൂമി മലയാളവും ഏലം കർഷകരും നീറുക യാണ്. ഫെബ്രുവരി മാർച്ചിലെ ഉയർന്ന താപനിലയെത്തുടർന്ന് മിക്ക ഏലത്തോട്ടങ്ങളും വരൾച്ചയുടെ പിടിയിലാണ്. പല തോട്ടങ്ങളിലെയും ജലസ്രോതസ്സുകൾ വറ്റിവരണ്ടത് ഏലച്ചെടി കളുടെ നിലനിൽപിനു ഭീഷണിയായി, നനയ്ക്കു പുതിയ മാർഗങ്ങൾ തേടുകയാണ് കൃഷിക്കാർ. പലയിടത്തും കുളങ്ങൾ വറ്റിയതിനാൽ ഹൈറേഞ്ചിലാകെ വെളളത്തിനു കടുത്ത ക്ഷാമം. ഇതിനിടയിൽ ഏലയ്ക്കായുടെ വില 6 മാസത്തിനിടയിലെ താഴ്ന്ന തലത്തിലെത്തിയത് കർഷകരെ കൂടുതൽ പ്രതിസന്ധിയിലാക്കി.