ദലൈലാമയ്ക്ക് മുമ്പിൽ ഒരേ ഒരു മലയാളി

2025 ജൂലൈ 6 ഹിമാചൽപ്രദേശിലെ ധരംശാല. ടിബറ്റൻ ആത്മീയ നേതാവ് ദലൈലാമയുടെ 90-ാം ജന്മദിനാഘോഷം. ദലൈലാമയുടെ നവതി ആഘോഷങ്ങളോടനുബന്ധിച്ച് ലോകത്തിന്റെ വിവിധ ഭാഗങ്ങളിൽ നിന്ന് കലാകാരന്മാരുടെ പ്രകടനങ്ങൾ അരങ്ങേറിയിരുന്നു. ജൂലൈ അഞ്ചിനും ആറിനും ഏഴിനുമായി മൂന്നു ദിവസമാണ് കലാപ്രകടനങ്ങൾ വ്യത്യസ്ത വേദികളിലായി ഒരുക്കിയത്. ഈ പരിപാടികളിൽ പങ്കെടുക്കാൻ ഒരേയൊരു ഇന്ത്യക്കാരി മാത്രമാണ് തെരഞ്ഞെടുക്കപ്പെട്ടത് -മലയാളിയായ ചിത്ര സുകുമാരൻ.

- മൈക്കിൾ വർഗ്ഗീസ് ചെങ്ങാടക്കരി

കലാകാരന്മാർക്കൊക്കെ ദലൈലാമയുടെ നവതിയിൽ ഒന്നോ രണ്ടോ വേദികൾ കിട്ടിയപ്പോൾ ചിത്ര സുകുമാരന് മൂന്നു ദിവസത്തെ വേദികളും സംഘാടകർ അനുവദിച്ചു. എല്ലാവർക്കും മൂന്നോ നാലോ മിനുട്ടായിരുന്നു സമയമെങ്കിൽ ചിത്ര സുകുമാരന്റെ നൃത്തങ്ങൾക്ക് പത്തു മിനുട്ട് വീതമാണ് വേദി നൽകിയത്. ടിബറ്റൻ ജനതയെ ഹൃദയപൂർവ്വം സ്വീകരിച്ച ഇന്ത്യയെന്ന മഹാരാജ്യത്തിനുള്ള സ്നേഹം കൂടിയായിരുന്നു ചിത്ര സുകുമാരനോട് അവർ പ്രകടിപ്പിച്ചത്.

പെരുമ്പാവൂരിൽ നിന്ന് ധരംശാലയിലേക്ക്

പെരുമ്പാവൂരിലെ ആദ്യത്തെ ജ്വല്ലറിയായ ടി പി നീലകണ്ഠൻ നായർ ആന്റ് സൺസിന്റെ രണ്ടാം തലമുറ നാരായണൻ നായരുടെയും 20 വർഷം നെല്ലിക്കുഴി പഞ്ചായത്ത് അംഗമായിരുന്ന എ എൻ വത്സലയുടേയും മകളാണ് ചിത്ര സുകുമാരൻ, സഹോദരൻ പ്രദീപ് എൻജിനീയറും സഹോദരി അഞ്ജലി നർത്തകിയും കലാതിലകുമൊക്കെയായിരുന്നുവെങ്കിലും ചിത്രയെപ്പോലെ നൃത്തത്തിൽ പൂർണമായും ഇറങ്ങിയില്ല.

1983-ൽ കണ്ണൂരിൽ നടന്ന സംസ്ഥാന സ്കൂൾ കലോത്സവത്തിൽ നൃത്ത ഇനങ്ങളിൽ ഒന്നാമതായിരുന്നു ചിത്ര. 1987-ൽ ദൂരദർശനിൽ മോഹിനിയാട്ടം, ഭരതനാട്യം ആർട്ടിസ്റ്റായി. പത്തൊൻപതാം വയസ്സിലാണ് സുകുമാരനുമായി വിവാഹം നടന്നത്. ഭർത്താവ് സുകുമാരൻ സൗദി അറേബ്യയിലെ താഇഫിൽ അൽ ഹാദ ആംഡ് ഫോഴ്സസ് ഹോസ്പിറ്റൽ അഡ്മിനിസ്ട്രേഷനിലായിരുന്നു. 1992-ൽ ബാബറി മസ്ജിദ് തകർത്തതോടെ ജോലി നഷ്ടമായി ഇന്ത്യയിലേക്ക് മടങ്ങേണ്ടി വരികയായിരുന്നു. തുടർന്നാണ് എറണാകുളത്ത് ഇരുവരും ചേർന്ന് ഫെസിലിറ്റി മാനേജ്മെന്റ് ബിസിനസ് ആരംഭിച്ചത്. ചിത്രയ്ക്കും സുകുമാരനും രണ്ടു മക്കൾ. ഡോ.ഗോപാലും ഇപ്പോൾ കാനഡയിലുള്ള അഡ്വ.പാർവതി നായരും.

അയ്യായിരത്തോളം ജീവനക്കാരും 80 കോടി ടേണോവറുമുള്ള എസ് ആന്റ് സി മൾട്ടി കൊമേഴ്സ്യൽസ് ലിമിറ്റഡിന്റെ മാനേജിംഗ് ഡയറക്ടറാണ് ചിത്ര സുകുമാരൻ, നൃത്തവും കർത്താവിനൊപ്പം ബിസിനസും ഒരേ രീതിയിൽ കൊണ്ടുപോകാൻ ഈ കുടുംബം ശ്രദ്ധിക്കുന്നു.

1995 മുതൽ സജീവമായി നൃത്ത രംഗത്തുള്ള ചിത്രയ്ക്ക് പൂർണ പിന്തുണയാണ് ഭർത്താവ് സുകുമാരനിൽ നിന്നും ലഭിക്കുന്നത്. ബിസിനസ് രംഗത്ത് സുകുമാരന് പിന്തുണയാണ് ചിത്രയെങ്കിൽ നൃത്തത്തിൽ ചിത്രയ്ക്ക് പിറകിലെ നെടുംതൂണാണ് സുകുമാരൻ.