ഓണവെയിലിൻ തിളക്കം പോൽ...

ചില ദേശങ്ങളിൽ, നമ്മൾ മലയാളികൾക്കിടയിൽ തന്നെ പിള്ളേരോണം എന്ന ആഘോഷം മറന്നുപോയിരിക്കുന്നു

- ജി. കൃഷ്ണൻ

ഓണപ്പൂവേ.. പൂവേ.. പൂവേ...

ഓമൽപ്പൂവേ.. പൂവേ...

നീ തേടും മനോഹരതീരം...

ദൂരെ മാടി വിളിപ്പൂ....

ഇതാ.... ഇതാ.... ഇതാ....

"ഈ ഗാനം മറക്കുമോ' എന്ന സിനിമയിലേതാണ് ഈ ഗാനം. പ്രേംനസീർ നായകനായി അഭിനയിച്ച സിനിമ. കുട്ടനാടൻ കായലിന്റെ ഓളങ്ങൾക്ക് മീതെ ഓടിപ്പോകുന്ന ഒരു ബോട്ടിലിരുന്നു കൊണ്ട് പ്രേംനസീർ പാടി അഭിനയിക്കുന്നു. ഒ.എൻ.വി.കുറുപ്പ് എഴുതി സലിൽ ചൗധരി ഈണമിട്ട ഈ ഗാനം യേശുദാസാണ് പാടിയത്. എൻ. ശങ്കരൻ നായരാണ് ഈ സിനിമയുടെ ഡയറക്ടർ.

ഈ ഓണക്കാലത്ത് ഇങ്ങനെയൊരു പാട്ട് ഓർത്തെടുത്തതിന് ഒരു കാരണം കൂടിയുണ്ട്. ഓണക്കാലമാകുന്നതോടെ പൂക്കളുടെ പ്രാധാന്യം എത്രയോ വലുതാണ്. അത്തം നക്ഷത്രം തുടങ്ങിയാൽ പിന്നെ പൂക്കളമിടാൻ ധാരാളം പൂക്കൾ വേണ്ടിവരും.

ഇവിടെയിപ്പോൾ സാരംഗിയും ദേവനന്ദയും അമൃതയും ഒന്നിച്ചു നിൽക്കുമ്പോഴും പൂക്കളുടെ ഭംഗി ആസ്വദിക്കാൻ കഴിയുന്നുണ്ട്. തെച്ചിപ്പൂവും ജറപറപ്പൂക്കളും നീലത്താമരയും എല്ലാം അവർ ധരിച്ചിരിക്കുന്ന വസ്ത്രങ്ങളിൽ വിരിഞ്ഞു നിൽക്കുന്നു. ആ പൂക്കൾക്ക് ഒരു മധുരചുംബനം നൽകിക്കൊണ്ട് ഒരു പൂത്തുമ്പി പറന്നുവന്ന് തേൻ നുകരുന്നു. ഓണം വന്നാൽ നമ്മുടെയെല്ലാം വീട്ടുമുറ്റത്ത് കാണാറുള്ള നിറമുള്ള കാഴ്ച.

ഫാഷൻ ഡിസൈനർ സ്മൃതി സൈമൺന്റെ മനോധർമ്മത്തിൽ വിടർന്ന പൂക്കളും പൂത്തുമ്പിയുമാണിത്. സാരംഗിയും ദേവനന്ദയും അമൃതയും സിനിമാക്കാരാണ്. പുതിയവരും പ്രേക്ഷകർക്കിടയിൽ ഏറെ ശ്രദ്ധ നേടിയവരുമായ മൂന്നുപേരുടെ ഒത്തുചേ രൽ കൂടിയാണ് ഈ സംഗമത്തിലൂടെ നടന്നിട്ടുള്ളത്.

“മാളികപ്പുറം' എന്ന സിനിമയാണ് ദേവനന്ദയെ കീർത്തിയിലേക്ക് നയിച്ചതെങ്കിൽ അമൃത പ്രശസ്തി നേടിയത് 'തുടരും' എന്ന സിനിമയിലൂടെയാണ്. ആ ചിത്രത്തിൽ മോഹൻലാലിന്റെ മകളായി അഭിനയിച്ച് ശ്രദ്ധ നേടിയിരിക്കുന്നു. ഈയടുത്ത് റിലീസായ 'യുണൈറ്റഡ് കിംഗ്ഡം ഓഫ് കേരള' എന്ന സിനിമയിലെ നായികയാണ് സാരംഗി.