താരങ്ങൾ ഒന്നിക്കും കല്യാണം

ആർപ്പും ആരവവുമുള്ള സുന്ദരസുരഭില വിവാഹം. സിനിമയിലും ടിവിയിലും തിളങ്ങി നിൽക്കുന്ന സുരഭി സന്തോഷും ഗായകൻ പ്രണവ് ചന്ദ്രനും, ബംപർ ചിരി താരം കാർത്തിക് സൂര്യയും വർഷയും വിവാഹവിശേഷങ്ങളുമായി എത്തുമ്പോൾ

- രൂപാ ദയാബ്ജി

മാട്രിമോണിയൽ സൈറ്റിൽ കണ്ട യുവഗായകന്റെ വിവാഹാലോചനയെ കുറിച്ച് അച്ഛൻ പറയുമ്പോൾ സുരഭി സന്തോഷ് ഒറ്റ കാര്യമേ പ്രാർഥിച്ചുള്ളൂ, അത് പെട്ടെന്നൊന്നും ദേഷ്യം വരാത്ത ആൾ ആകണേ...'ആ പ്രാർഥന ദൈവം കേട്ടെന്നു പറഞ്ഞു ചിരിച്ചാണു ഭർത്താവ് പ്രണവ് ചന്ദ്രന്റെ കൈപിടിച്ചു സുരഭി വിവാഹ വിശേഷങ്ങൾ പറഞ്ഞത്.

"സ്വന്തം നാട് തിരുവനന്തപുരം ആണെങ്കിലും ആർമി ഉദ്യോഗസ്ഥനായിരുന്ന അച്ഛൻ സന്തോഷ് കുമാറിന്റെ ജോലിക്കൊപ്പം പല നാടുകളിലായാണു പഠിച്ചതൊക്കെ.

വിആർഎസ് എടുത്ത് അച്ഛൻ വന്നതോടെ ചേട്ടൻ ശശാങ്കും അമ്മ സിന്ധുവും ഞാനും ബെംഗളൂരുവിൽ താമസമാക്കി. നിയമപഠനത്തിനു ശേഷം അഡ്വക്കേറ്റായി പ്രാക്ടീസ് ചെയ്യുന്നതിനിടെ ആയിരുന്നു സിനിമാ അഭിനയമൊക്കെ.

അങ്ങനെയിരിക്കെ മാട്രിമോണി പേജിൽ പേരു റജിസ്റ്റർ ചെയ്തു. കുട്ടനാടൻ മാർപ്പാപ്പയിലെ വധൂവേഷം കഴിഞ്ഞാകും വിവാഹപ്രായമായി എന്ന് അച്ഛനു തോന്നിയത് എന്നു ഞാൻ ഇടയ്ക്കു കളിയാക്കും. മാട്രിമോണി പേജിൽ നിന്നു പ്രണവ് ചന്ദ്രൻ എന്ന പാട്ടുകാരന്റെ പ്രൊഫൈൽ കണ്ടെത്തിയത് അച്ഛനാണ്. കണ്ണൂർ പയ്യന്നൂരിനടുത്തു കുടുംബമുള്ള, മുംബൈയിൽ ജനിച്ചു വളർന്ന മലയാളി. അച്ഛൻ ചന്ദ്രശേഖരനും അമ്മ പ്രേമലതയും ചേട്ടൻ പ്രജിത് ചന്ദ്രനും ചേട്ടത്തിയും രണ്ടു മക്കളുമൊക്കെ മുംബൈയിൽ തന്നെ, അച്ഛൻന്മാർ തമ്മിലാണ് ആദ്യം ഫോണിൽ സംസാരിച്ചത്, പിന്നെ ഞങ്ങളും.

മനസ്സു പറഞ്ഞു. യെസ്

“രണ്ടു മാസം ഫോണിൽ സംസാരിച്ച ശേഷമാണ് ആദ്യ കൂടിക്കാഴ്ച, പ്രണവ് ബെംഗളൂരുവിൽ വന്നു. ഞങ്ങൾ ഡിന്നർ കഴിക്കാൻ പോയി. അവിടെ വച്ചൊരു സംഭവമുണ്ടായി, അടുത്ത ടേബിളിലേക്കു കൊണ്ടുവന്ന ഓർഡറിൽ എന്തോ പ്രശ്നം. അവർ ഹോട്ടൽ ബോയ്യെ വഴക്കു പറയുന്നതു കേട്ടു പ്രണവ് ഇടപെട്ടു.

“പന്ത്രണ്ടും പതിമൂന്നും മണിക്കൂർ നിന്നു ജോലി ചെയ്യുന്നതാണ്, എനർജി മുഴുവൻ കഴിഞ്ഞു ക്ഷണിച്ചു നിൽക്കുമ്പോൾ ഫോക്കസ് കുറവാകും. നമ്മളും മനുഷ്യരല്ലേ, എന്തിനാണു വഴക്കു പറയുന്നത്.' എന്നൊക്കെ അവരോടു ചോദിക്കുന്നതു കേട്ടപ്പോൾ മനസ്സു പറഞ്ഞു, യെസ്.

പിറ്റേ ദിവസം പ്രണവ് അച്ഛനോടും അമ്മയോടും സംസാരിച്ചു. അവരോട് ഇടപഴകുന്ന രീതിയും ഇഷ്ടപ്പെട്ടു. രണ്ടുപേർ വിവാഹം കഴിക്കുമ്പോൾ കുടുംബങ്ങൾ കൂടി ചേരേണ്ടതു പ്രധാനമാണ്. അങ്ങനെ സെറ്റ് ആയില്ലെങ്കിൽ ആ പ്രശ്നങ്ങൾ ദാമ്പത്യത്തിലും കരടാകും. ആ കാര്യത്തിലെല്ലാം ഞാൻ ലക്കിയാണ്. അദ്ദേഹത്തിന്റെ കുടുംബവുമായി വളരെ വേഗം അറ്റാച്ച്ഡ് ആയി.