பக்தர்களின் துயர் தீர்க்கும் தெப்பக்குளம் மாரியம்மன்!

தேவ அசுரர்கள் என்பது நமக்குள்ளேயே இருக்கிறது. நமக்குள் உள்ள சுத்தமான புலன்களின் ஓட்டம் தேவர்கள். அசுரர்கள் என்பது சிற்றின்பங்களின் மீதான ஆசையில் நம்மை தவறான பாதையில் செலுத்தும் எண்ணங்கள். காலம் காலமாக மனிதர்களுக்குள் நடக்கும் இந்தப் போராட்டங்களே தேவ அசுரப் போர்கள்.

- -ஜி.ஏ.பிரபா

"ஸர்வ ப்ராணிஷூ ப்ரதிதேஹம் தேவாஸீர ஸங்க்ராமோ" என்கிறார் சங்கரர். தீய எண்ணங்கள் ஜீவன்களை பாவ வழியில் செலுத்துகிறது. அந்த உணர்வுகளை உள்முகப்படுத்தி, எல்லையற்ற பேரின்பத்தில் நம்மை ஆழ்த்துவது தேவ குணங்கள்.

ஒவ்வொரு மனித உயிர்களுக்குள்ளும் இந்தப் போராட்டம் நடக்கிறது. தானம், தபஸ், நேர்மை, அஹிம்சை, பொறாமையின்மை, மன்னித்தல், தியாகம், சாந்தம், கருணை, கனிவு இவை தேவ குணங்கள். இதற்கு எதிரிடையாகவே அசுர குணங்கள் இருக்கின்றன.

நமக்குள் இருக்கும் தீய எண்ணங்களை அழித்து, தேவ குணத்துடன் வாழச் செய்வது அம்பிகையின் மீதான பக்தி. அவள் இருக்கிறாள் என்ற நம்பிக்கையே நம்மை வாழ வைக்கிறது. அம்பிகை இருக்கும்போது நாம் எதற்கும் பயப்பட வேண்டியதில்லை.

நம் வாழ்க்கையில் எவ்வளவு பெரிய துன்பங்கள் வந்தாலும் அம்பிகை இருக்க நான் அனைத்திலிருந்தும் மீண்டு வருவேன் என்ற உறுதி வேண்டும். இடைவிடாத வேண்டுதலும், நம்பிக்கையுமே முக்கியம்.

அந்த நம்பிக்கையை உறுதிப்படுத்துவது அவளின் அருட்கொடைதான். அள்ளி வழங்கும் கருணை வள்ளலாக அவள் இருப்பதால், பக்தர்களின் கோரிக்கைகளை உடனுக்குடன் நிறைவேற்றுகிறாள். அம்பிகையின் பல்வேறு வடிவங்களில் அழைத்ததும் ஓடி வருபவள் மாரியம்மன்.

ஏழைகளின் மாமருந்து. அவர்களின் உயிர் சுவாசம் மாரியம்மன். அவள் பெரிய, பெரிய கட்டிடங்களையோ, விழாக்களையோ, அபிஷேக ஆராதனைகளோ கேட்பதில்லை. நம்பிக்கை மட்டுமே. அவள் வருவாள் என்று அம்மா என்று உயிர் உருக அழைத்தால் ஓடி வருவாள்.

பல்வேறு தலங்களில், பல்வேறு நாமங்களுடன் மாரியம்மன் காட்சி அளித்தாலும் அதில் சிறப்பு வாய்ந்தது வண்டியூர் தெப்பக்குளம் மாரியம்மன். மதுரையில் உள்ள மாரியம்மனின் பெயரைக் கேட்டாலே அந்த மக்களுக்கு, சிலிர்ப்பும், பரவசமும் தொற்றிக் கொள்ளும். திருமலை நாயக்கரால் உருவாக்கப்பட்ட இந்த தெப்பக்குளம், மாரியம்மன் தெப்பக்குளம் என்று அழைக்கப்படுகிறது.

திருமலை நாயக்கர் மஹால் கட்டுவதற்காக மண் தோண்டும்போது ஏற்பட்ட பள்ளத்தில் உண்டாக்கப்பட்டது இந்தத் தெப்பக் குளம். இங்கு கிடைத்த பிரம்மாண்ட வினாயகரே முக்குறுணி விநாயகராக மதுரை மீனாட்சி அம்மன் ஆலயத்தில் வீற்றிருக்கிறார்.