சர்க்கரை நோய்: அச்சமும் வேண்டாம்! அலட்சியமும் வேண்டாம்

ஒருகாலத்தில் பணக்கார வியாதி, பணக்கார்களை மட்டும் பாதிக்கும் வியாதி எனப்பட்ட “நீரிழிவு நோய்" என்னும் சர்க்கரை வியாதி இப்பொழுது எங்கும் நீக்க மற நிறைந்திருப்பதை காண்கிறோம்.

- -டாக்டர் எம். செல்வராஜ், மதுரை.

எனது 45-ஆண்டு கால மருத்துவ சேவையில் புதிதாக ஒருவருக்கு சர்க்கரைநோய் கண்டு பிடிக்கப்பட்டதை தெரிவித்தவுடன் கண்கலங்கி கண்ணீர் விட்டவர்களும் சர்க்கரைநோய் வந்து விட்டதே என தூங்காத இரவுகளை கழித்தவர்களும் சர்க்கரை நோய் தாக்கிய பின் அந்த வியாதியைப்பற்றி சற்றும் பொருட்படுத்தாமல் அலட்சியபோக்கால் பிற்காலத்தில் நிவர்த்தி செய்ய முடியாத பின் விளைவுகளால் அவதிப்பட்டவர்களையும் அல்லது மரணத்தை தழுவியவர்களையும் பார்த்திருக்கிறேன்.

இவ்விரு ரக நோயாளிகளின் மனப்பக்குவமும் ஏற்றுக்கொள்ள தக்கதல்ல.

சர்க்கரை நோய் இன்றைய நிலவரப்படி அரிதான நோயல்ல!

2015-ம் ஆண்டு கணக்குபடி உலகில் 415 மில்லியன் நபர்கள் சர்க்கரை நோயால் பாதிக்கப் பட்டுள்ளனர். இந்த எண்ணிக்கை 642 மில்லியனாக 2040 ஆண்டு வாக்கில் உயரும் என கணக்கிடப்பட்டுள்ளது.

உலக அளவில் சீனாவில் தான் அதிக அளவில் சர்க்கரை நோயாளிகள் உண்டு.

அதற்கு அடுத்தப்படி நமது இந்தியா நாடு வருகிறது. தற்பொழுது இந்தியாவில் 70 மில்லியன் அல்லது அதற்கு அதிகமாக 2030 ஆண்டு வாக்கில் உயரும். மிக விரைவில் சர்க்கரை நோயாளிகளின் எண்ணிக்கையில் உலகளவில் முதலிடம் பிடித்து விடும் இந்தியா.

ஏன் இந்த அவலம்?:

நாம் இப்பொழுது மிகவும் சோம்பேறி களாகிவிட்டோம். மிக அருகாமையில் உள்ள கடைகளுக்குச் செல்லக்கூட நடப்பதில்லை. இருச்சக்கர, 4 சக்கர வாகனங்களை பயன்படுத்துகிறோம்.

உந்து வண்டியை (சைக்கிள்) அடியோடு மறந்து விட்டோம்.

கிரைண்டர், மிக்ஸி வாஷிங் மிஷன்களெல்லாம் உடல் உழைப்பை மறக்க வைத்துவிட்டன. மின் விசிறியை இயக்குவதற்கு கூட ரிமோட் வந்து விட்டது. அளவுக்கு மீறி நாக்கு சுவைக்கு முக்கியத்துவம் கொடுத்து ஐஸ்கிரிம்கள், கேக்குகள் அதிலும் பட்டர்ஸ்காட்ச் கேக், அசைவபிரியாணிகளை தின்று சர்க்கரை நோயை அறை கூவி அழைத்து விட்டோம்!

தொலைக்காட்சி தொடர்களில் மூழ்கி வீட்டில் சமைக்காமல் ஆன்லைன் ஆர்டர் கொடுத்துப்பழகி, உடல் பருமனைப் பற்றி கவலைப்படாமல் இருத்தல் ஆகியன சர்க்கரை நோயை கொடி கட்டி பறக்க வைத்து விட்டது. உடல் உழைப்பு இல்லாவிட்டால் வரும் முதல் நோய் சர்க்கரை நோயாகும்.