ചൂടു കുറയ്ക്കാം ഊർജക്ഷമത കൂട്ടാം

കാര്യക്ഷമത കൂടിയ ജനൽ ചില്ലുകളും ഫ്രെയിമുകളും ചുമരുകളും ചൂടിനെ നിയന്ത്രിക്കും

- ഡോ. എ. പി. അർച്ചന അസിസ്റ്റന്റ് പ്രഫസർ ആർക്കിടെക്ചർ വിഭാഗം രാജീവ് ഗാന്ധി ഇൻസ്റ്റിറ്റ്യൂട്ട് ഓഫ് ടെക്നോളജി, കോട്ടയം archana9090@gmail.​com

ഊർജ ഉപയോഗം കുറയ്ക്കാൻ കാര്യക്ഷമമായ സംവിധാനങ്ങൾ ആവശ്യമാണ്. ഊർജ കാര്യക്ഷമമായ എയർ കണ്ടീഷനിങ് യൂണിറ്റുകൾ, ജനാലകൾ, കൂൾ റൂഫുകളും ഗ്രീൻ റൂഫുകളും, സ്മാർട്ട് ലൈറ്റിങ് സംവിധാനങ്ങൾ, പുനരുപയോഗ ഊർജ സംയോജനം, ഊർജ നിരീക്ഷണം എന്നിവയാണവ.

ജനാലകൾ ചൂടു കൂട്ടാതെ

വായുസഞ്ചാരത്തിനും വെളിച്ചത്തിനും വേണ്ടിയാണ് ജനാലകൾ. ശുദ്ധവായു കൈമാറ്റം ഉറപ്പാക്കാനും വായുവിലെ മാലിന്യങ്ങൾ നീക്കം ചെയ്യാനും വെന്റിലേഷൻ സഹായിക്കുന്നു. ഏറ്റവും കൂടുതൽ ചൂട് പെട്ടെന്ന് അകത്തേക്കുന്നത് ജനലിന്റെ ഗ്ലാസ് വഴിയാണ്. ഊർജ കാര്യക്ഷമമായ (Energy efficient) ഗ്ലാസ്സ് കൊടുക്കുന്നതുവഴി ചൂട് അകത്തേക്ക് വരുന്നത് കുറയ്ക്കാൻ സാധിക്കും. ചൂടും ഊർജനഷ്ടവും കുറയ്ക്കുന്നതിനും വീട്ടന്തരീക്ഷം മെച്ചപ്പെടുത്തുന്നതിനുമായി പ്രത്യേകം രൂപകല്പന ചെയ്തിട്ടുള്ളതാണ് ഇത്തരം ഗ്ലാസ്സുകൾ.

അനാവശ്യമായ താപ വർദ്ധനവോ ഊർജ നഷ്ടമോ തടയുന്നതിന് ലോ ഇ കോട്ടിങ്ങുകൾ (Low E coatings), മൾട്ടിപ്പിൾ ഗ്ലേസിങ് (multiple glazing), ഇൻസുലേറ്റഡ് ഫ്രെയിമുകൾ തുടങ്ങിയ നൂതന വസ്തുക്കൾ ഉപയോഗിച്ചു നിർമിച്ച ജനൽ ചില്ലുകൾ സഹായിക്കും.