ശാന്തം സാന്തോം

ചെന്നൈയിലെ സാന്തോം കത്തീഡ്രൽ എന്നറിയപ്പെടുന്ന സെന്റ് തോമസ് കത്തീഡ്രൽ ബസിലിക്കയിലേക്ക് ഉയർത്തെഴുന്നേൽപ്പിന്റെ വിശ്വാസപ്പെരുമകൾ കേട്ട് യാത്ര

- വിജീഷ് ഗോപിനാഥ്

രാത്രി. സാന്തോം പള്ളിയുടെ ഗോപുരങ്ങളിൽ വർണവിളക്കുകൾ കണ്ണു തുറന്നു. ആൾത്തിരക്ക് ഒഴിഞ്ഞെങ്കിലും പ്രാർഥനയോടെ നിൽക്കുന്നവരുണ്ട്. ചിലർ മെഴുകുതിരി പോലെ എരിയുന്നുണ്ട്. കണ്ണുകളിൽ സങ്കടത്തിന്റെ കടൽത്തിര പള്ളിമുറ്റത്ത് കണ്ണടച്ചിരുന്നു, അകലെ നിന്നു കടൽക്കാറ്റ് പതുക്കെ തൊട്ടു. മനസ്സിലെ കടൽ ശാന്തമാവുന്നു. ഇരുളിൽ കൈത്തിരി തെളിഞ്ഞതു പോലെ. വഴി കാണാതെ അലയുന്ന കുഞ്ഞാടുകൾക്കു മുന്നിൽ തെളിഞ്ഞ വെളിച്ചം... നാഥാ, അഭയത്തിന്റെ കാരുണ്യം ചൊരിയേണമേ...

പി റ്റേന്ന് പകൽ മാർച്ചിലെ വെയിൽ ടിൽ പഴുത്തു കിടക്കുകയാണു മറീന ബീച്ച്. കടലിൽ നിന്നു കനൽക്കാറ്റാണ് ഓട്ടോയിലേക്ക് അടിച്ചു കയറുന്നതെന്നു തോന്നി. പക്ഷേ, രണ്ടു കിലോമീറ്റർ അപ്പുറമുള്ള സാന്തോം ചർച്ചിലേക്കു കാലെടുത്തു വച്ചപ്പോൾ മനസ്സിൽ നിറഞ്ഞതു വിശ്വാസത്തിന്റെ പ്രാർഥനയുടെ തണുപ്പാണ്.

വെയിൽ കഴുകിയുണക്കിയ നീലാകാശത്തിലേക്കു തലയുയർത്തി നിൽക്കുന്നു സാന്തോം കത്തീഡ്രൽ ബസിലിക്ക, ഞായറാഴ്ചയാണ്, പതി നൊന്നരയ്ക്കുള്ള കുർബാന നടക്കുന്നുണ്ട്.

ചരിത്രത്തിൽ ഇടം നേടിയ പള്ളിയാണ് മൈലാപ്പൂരിലെ സാന്തോം കത്തീഡ്രൽ. ഇന്ത്യയുടെ വിവിധ ഭാഗത്തു നി ന്ന് വിശ്വാസികൾ ഈ തീരത്തേക്ക് ഒഴുകിയെത്തുന്നു. ഐതിഹ്യവും വിശ്വാസവും കഥകളും ഈ മുറ്റത്തു നിറയെയുണ്ട്. അപ്പോസ്തല ദൗത്യവുമായി ഭാരതത്തിലെത്തിയ ക്രിസ്തുശിഷ്യൻ തോമാശ്ലീഹയുടെ രക്തസാക്ഷിത്വം ഇവിടെയാണ്. ആ കബറിടത്തിനു മീതെയാണ് പള്ളി നിർമിച്ചിരിക്കുന്നത്. ലോകത്തു തന്നെ ആകെ മൂന്നിടത്താണു ശ്ലീഹമാരുടെ കബറിടത്തിനു മുകളിൽ ദേവാലയങ്ങൾ നിർമിച്ചിട്ടുള്ളത്. റോമിൽ വിശുദ്ധ പത്രോസിന്റെയും സ്പെയിനിൽ വിശുദ്ധ യാക്കോബിന്റെയും മൈലാപ്പൂരിൽ വിശുദ്ധ തോമാശ്ലീഹയുടെയും. ഇത്തരത്തിൽ ഇന്ത്യയിലുള്ള ഏക പള്ളിയും ഇതാണ്.

ഒരു നൂറ്റാണ്ടിലേറെ പഴക്കമുണ്ടെങ്കിലും ഉപ്പുള്ള കടൽ ക്കാറ്റ് എന്നും കൈപിടിച്ചു കൊണ്ടിരുന്നിട്ടും പ്രായത്തെ തോൽപ്പിച്ച് തലയുയർത്തി നിൽക്കുന്ന ദേവാലയത്തിനകത്തേക്കു നടന്നു.

പ്രാർഥനകൾ എരിയുന്നു