ചൂടിനെ നേരിടാൻ കൂൾ വഴികൾ

വേനൽച്ചൂടിൽ വാടാതിരിക്കാൻ ആരോഗ്യത്തിനു പ്രത്യേക കരുതൽ ആവശ്യമാണ്. ചൂടിലും എനർജറ്റിക് ആകാൻ കൂൾ ടിപ്സ്

- ഡെൽന സത്യരത്ന

ചൂടെടുത്തു തളർന്നിട്ട് ഓടിപ്പോയി വെള്ളത്തിൽ ചാടാൻ തോന്നുന്നുണ്ട്. പക്ഷേ, കുറേ മാസങ്ങളായി പൂൾ കാണുന്നതേ പേടിയാണ്. ബെയ്ൻ ഈറ്റിങ് അമീബ തന്നെ കാരണം. "ഈശ്വരാ ഈ നാട്ടിൽ ചൂടെടുത്താൽ ഒന്നു നീന്താൻ പോകാനും പാടില്ലേ. എന്നു പറഞ്ഞു പോകുന്നത് ചൂടുണ്ട് മാർച്ച് മുതൽ മേയ് വരെ കൊച്ചുകേരളത്തെ പൊള്ളിക്കുന്ന സൂര്യന്.

വേനൽക്കാലം ചൂടിന്റെ കാലം മാത്രമല്ല, ശരീരത്തിന്റെയും മനസ്സിന്റെയും പരീക്ഷണകാലം കൂടെയാണ്. മൂന്ന് ആയുധങ്ങൾ ഇതിനെതിരെ മുൻകരുതലിനായി കരുതണം. അനുയോജ്യമായ ഭക്ഷണം, ധാരാളം വെള്ളം, നല്ല ഉറക്കം. കേട്ടു തഴമ്പിച്ചതാണെങ്കിലും ഈ മൂന്നു പ്രാധാന കാര്യങ്ങൾ മറന്നാൽ ആരോഗ്യം കൈവിട്ടു പോയേക്കാം.

മുൻകരുതലുകൾ സ്വീകരിക്കാം

വളരെയധികം വിയർക്കുമ്പോൾ ശരീരത്തിലെ ജലാംശം നഷ്ടപ്പെടുന്നതിനൊപ്പം സോഡിയം കുറയുകയും ചെയ്യും. ദാഹം തോന്നിയില്ലെങ്കിൽപ്പോലും ഇടയ്ക്കിടെ വെള്ളം കുടിക്കണം. വെള്ളം മാത്രം മതിയാവുകയുമില്ല. ക്ഷീണം തോന്നുന്നുവെങ്കിൽ ഒആർഎസ് കൂടി കലർത്തിയ വെള്ളം കുടിക്കണം.

നാരങ്ങ വെള്ളം ഉപ്പിട്ടു കുടിക്കുക.

ജ്യുസുകളെക്കാൾ പഴങ്ങൾ കൂടുതലായി ഉപയോഗിക്കണം. പ്രമേഹം പോലുള്ള ആരോഗ്യപ്രശ്നങ്ങളുള്ളവർ പഴങ്ങൾ കഴിക്കും മുൻപ് ഡോക്ടറുടെ നിർദേശം തേടണം.

പുറത്തിറങ്ങേണ്ടി വരുന്നവർ മാത്രമല്ല, കെട്ടിടത്തിനുള്ളിൽ കഴിയുന്നവരും മുൻകരുതലുകൾ സ്വീകരിക്കണം.

ക്രോണിക് ഹൃദ്രോഗാവസ്ഥയിലുള്ളവർ, മരുന്നുകൾ സ്ഥിരമായി കഴിക്കുന്നവർ, പ്രായമായവർ, പാലിയേറ്റീവ് കെയർ സ്വീകരിക്കുന്നവർ തുടങ്ങിയവരെല്ലാം നല്ല വായു സഞ്ചാരമുള്ള മുറിയിലേ കഴിയാവൂ.

ചായ, കാപ്പി തുടങ്ങിയ ചൂടുപാനീയങ്ങളും പഞ്ചസാര ധാരാളമുള്ള പാനീയങ്ങളും ഒഴിവാക്കാം.

ഡീ ഹൈഡ്രേഷൻ, മാനസികമായ അസ്വസ്ഥതകൾ എന്നിവയെല്ലാം ചൂടു കാരണം വന്നേക്കാം. ഹീറ്റ് സ്ട്രോക് ഇതുവരെ റിപ്പോർട്ട് ചെയ്തിട്ടില്ലെങ്കിലും ഹീറ്റ് റാഷുകൾ മൂലമുള്ള ബുദ്ധിമുട്ടുകൾ പലരേയും അലട്ടുന്നുണ്ട്. ചുവന്ന പൊള്ളലുകൾ പോലെയാണു ഹീറ്റ് റാഷ് കാണപ്പെടുക. ബാധിക്കപ്പെട്ട ഭാഗം ചൊറിയാനും സാധ്യതയുണ്ട്. ഇവിടം തണുപ്പിക്കുകയാണ് വേണ്ടത്. കലാമിൻ ലോഷൻ പുരട്ടുകയും ചെയ്യാം.

ജലജന്യരോഗങ്ങളും വേനൽച്ചൂടിൽ കൂടാറുണ്ട്. ജല ലഭ്യത കുറയുന്ന സമയമായതുകൊണ്ട് പുറത്തു നിന്ന് ഭക്ഷണപാനീയങ്ങൾ കഴിക്കുമ്പോൾ കരുതൽ വേണം.