“മിന്നൽവള' പെണ്ണഴക്

“എനിക്ക് ബംഗാളി സംസാരിക്കാനറിയാം. ബംഗാളി സിനിമയിൽ അഭിനയിക്കണമെന്നു മോഹമുണ്ട് '' നടി പ്രിയംവദ പറയുന്നു

- രാഖി റാസ്

തൊട്ടതെല്ലാം തീ എന്ന മട്ടിലാണു പ്രിയംവദയ്ക്ക് കഥാപാത്രങ്ങളെ കിട്ടിയത്. അഭിനയം കൊതിച്ച കൊച്ചു പെൺകുട്ടിയുടെ ആദ്യ സിനിമ തൊട്ടപ്പൻ. വിനായകനൊപ്പമുള്ള ശക്തമായ കഥാപാത്രമായിരുന്നു. ആദ്യ സിനിമ തന്നെ മികച്ച അഭിനയത്തിനുള്ള സ്പെഷൽ മെൻഷൻ സംസ്ഥാന അവാർഡ്, ടൊവീനോ തോമസ് നായകനായ നരി വേട്ടയിലെ "മിന്നൽ വള കയ്യിലിട്ട പെണ്ണഴകേ' എന്ന ഗാനരംഗം ഇന്റർനാഷനൽ ഹിറ്റ്. വിലായത് ബുദ്ധ എന്ന സിനിമയിൽ പൃഥ്വിരാജിന്റെ കിടിലൻ കഥാപാത്രത്തിനൊപ്പം കത്തി നിൽക്കുന്ന നായിക. കൈനിറയുന്ന കഥാപാത്രങ്ങളല്ല, കാമ്പുള്ളതിനോടാണു പ്രിയംവദ കൃഷ്ണന് താത്പര്യം.

സ്കൂൾ നാടകങ്ങളിൽ പോലും അഭിനയിച്ചിട്ടില്ലാത്ത കുട്ടി ഉള്ളിലെ അഭിനേത്രിയെ എങ്ങനെ കണ്ടെത്തി?

ആദ്യ സിനിമ കഴിഞ്ഞപ്പോഴാണ് അഭിനയിക്കാനറിയാം എന്നു സ്വയം ബോധ്യപ്പെട്ടത്. ഒരു കാര്യത്തിൽ എത്രമാത്രം ആവേശകരമായി മുന്നോട്ടു പോകാനാകുമെന്ന് എന്റെ അച്ഛന്റെയും അമ്മയുടെയും ജീവിതത്തിൽ നിന്നു ഞാൻ മനസിലാക്കി.

ബംഗാളിയായ അമ്മ പല്ലവി കൃഷ്ണൻ കേരളത്തിന്റെ നൃത്തരൂപമായ മോഹിനിയാട്ടം പഠിക്കാൻ മാത്രമായി കേരളത്തിൽ വന്നയാളാണ്. മോഹിനിയാട്ടത്തിന്റെ മേഖലയിൽ സ്വന്തമായൊരു ഇടം കണ്ടത്താനും അതിൽ ഉറച്ചു നിൽക്കാനും അവരെടുത്ത ശ്രമം അദ്ഭുതകരമാണ്. കടൂർകാരനായ അച്ഛൻ കെ.കെ.ഗോപാലകൃഷ്ണൻ അതേ ആവേശത്തോടെ എഴുത്തിന്റെ ലോകത്തുണ്ട്. കലാചരിത്രകാരനും ഫൊട്ടോഗ്രഫറും പ്രഭാഷകനുമാണ്. എന്താകണം കരിയർ എന്ന ചിന്തയൊക്കെ എന്റെയുള്ളിൽ വന്നത് എട്ടിലോ ഒൻപതിലോ പഠിക്കുമ്പോഴാണ്. അന്നേ മനസ്സിൽ ഉറപ്പിച്ചതാണ് അഭിനയം ആണ് കരിയറെന്ന്.

ഒരു ജീവിതത്തിൽ പല ജീവിതങ്ങൾ ജീവിച്ചു തീർക്കാൻ അഭിനയത്തിലൂടെ കഴിയും എന്നത് എന്നെ ആകർഷിച്ചു. പ്ലാൻ ബി അന്നും ഇന്നും എനിക്കില്ല.

പലരും വർഷങ്ങൾ കാത്തിരുന്നു കിട്ടുന്ന തരം കഥാപാത്രം ആദ്യ സിനിമയിൽ തന്നെ ലഭിച്ചല്ലോ ?

വിഷ്വൽ കമ്യൂണിക്കേഷനിൽ ബിരുദത്തിനു ശേഷം അഭിനയം സംബന്ധിച്ച എന്തെങ്കിലും കോഴ്സ് ചെയ്യണം എന്നു തീരുമാനിച്ചിരുന്നു. ഡിഗ്രി സെക്കൻഡ് ഇയറിൽ സെമസ്റ്റർ ബ്രേക്ക് സമയത്താണു തൊട്ടപ്പന്റെ ഒഡീഷന് പോകുന്നത്. എത്രത്തോളം അവതരണ സാധ്യതയുള്ള റോളാണ് തൊട്ടപ്പനിലേത് എന്നറിയുന്നത് അഭിനയിച്ചു തുടങ്ങിയപ്പോഴാണ്.