കുട്ടിക്കുണ്ടോ ഈ ലക്ഷണങ്ങൾ?

കുട്ടികളെ ബാധിക്കുന്ന പ്രമേഹം തുടക്കത്തിലെ എങ്ങനെ തിരിച്ചറിയാം? രോഗസാധ്യത തടയാനുള്ള ജീവിതശൈലി രൂപപ്പെടുത്താൻ അറിയേണ്ടത്

- ഡോ. ആർ. വി. ജയകുമാർ സീനിയർ കൺസൽറ്റന്റ് എൻഡോക്രൈനോളജി, ആസ്റ്റർ മെഡ് സിറ്റി കൊച്ചി, കാരിത്താസ് ഹോസ്പിറ്റൽ, കോട്ടയം

എട്ടു വയസ്സുകാരി ദേവു അടിക്കടി വെള്ളം കുടിക്കും. വേനൽച്ചൂട് സഹിക്കാൻ കഴിയാഞ്ഞിട്ടാകും എന്നാണ് മാതാപിതാക്കൾ ആദ്യം കരുതിയത്. പക്ഷേ, മഴക്കാലമായിട്ടും ശീലത്തിൽ മാറ്റമുണ്ടായില്ല. ശരീരഭാരം പെട്ടെന്നു കുറഞ്ഞു. എപ്പോഴും ക്ഷീണവും. ഡോക്ടറെ കണ്ടു പരിശോധനകൾ നടത്തി. ടൈപ് ഡയബറ്റിസ് ആണെന്നു കണ്ടെത്തി.

പ്രമേഹം സ്ഥിരീകരിച്ച് മൂന്നു മാസത്തിനുള്ളിൽ അവളുടെ സുഹൃത്ത് അദ്വൈതിനും പ്രമേഹം സ്ഥിരീകരിച്ചു. രണ്ടുപേരും കുട്ടികളാണെങ്കിലും അദ്വൈത് എന്ന 12 വയസ്സുകാരനു ജീവിതശൈലി മാറ്റങ്ങളുടെ ഭാഗമായി വന്നേക്കാവുന്ന ടൈപ് 2 ഡയബറ്റിസ് ഓഫ് ദി യങ് ആയിരുന്നു. ജനിതക ഘടനയിൽ സംഭവിക്കുന്ന മാറ്റം മൂലമുണ്ടാകുന്ന മോഡി ഡയബറ്റിസ് ആണ് മൂന്നാമത്തെ വിഭാഗം. എല്ലാ പ്രമേഹവും ഒന്ന് അല്ലാത്തതിനാൽ ടൈപ് കൃത്യമായി തിരിച്ചറിയുക പ്രധാനമാണ്.

വില്ലൻ പുറത്തല്ല, അകത്താണ്

പ്രമേഹബാധിതരായ 60 ശതമാനം കുട്ടികളിലും കണ്ടു വരുന്നത് ടൈപ് 1 ഡയബറ്റിസ് ആണ്. ടൈപ് 1 ഡയബറ്റിസിൽ പാരമ്പര്യം ഘടകമേയല്ല. ശരീരത്തെ സംരക്ഷിക്കേണ്ട ആന്റിബോഡി ഉണ്ടാക്കുന്ന കോശങ്ങൾ തന്നെ ആക്രമണകാരിയായി മാറിയാലുള്ള സാഹചര്യം സങ്കൽപിച്ചു നോക്കൂ. ടൈപ് 1 ഡയബറ്റിസിൽ ശരീരത്തിന്റെ രോഗപ്രതിരോധ സംവിധാനം പാൻ ക്രിയാസ് ഗ്രന്ഥിയെ ആക്രമിക്കുന്നു. അതിന്റെ ഫലമായി ഇൻസുലിൻ ഉത്പാദക കോശങ്ങൾ നശിക്കും. ഈ സ്ഥിതി വന്നാൽ കുട്ടിക്കു ജീവിതകാലം മുഴുവൻ ഇൻസുലിൻ നൽകേണ്ടതായി വരും. ടൈപ് 1 ഡയബറ്റിസ് ഉള്ളവർക്കു സാധാരണയായി മെലിഞ്ഞ ശരീരപ്രകൃതമായിരിക്കും.